Соперничката на Доналд Трамп на претседателските избори во 2016 година, Хилари Клинтон, даде поддршка за номинацијата на демократот Џо Бајден за кандидат за претседател на изборите на САД годинава.
Својата изјава таа ја даде на онлајн-средбата со Бајден одржана денеска на која тие дискутираа за влијанието на ковид-19, посебно за тоа како се одразува врз животот на жените.
Клинтон, која е поранешна американска државна секретарка, истакна дека имала чест да работи со Бајден повеќе години и дека може да говори за тоа како тој ги обединува луѓето.
„Замислете каква разлика е да имате вистински претседател, а не некој кој глуми претседател на телевизија“, истакна таа,
индиректно критикувајќи го противникот кој ја победи во 2016 година.
Поддршката на Клинтон доаѓа еден ден откако Бајден беше поддржан и од Ненси Пелоси, водечка демократка и спикер на Претставничкиот дом во американскиот Конгрес.