На 3 февруари 2022 година Граѓанскиот суд Скопје донесе пресуда против здружението „Од нас за нас“ за сторена клевета против ХЕРА – Асоцијација за здравствена едукација поради континуирано изнесување невистинити факти за самата организација и за сеопфатното сексуално образование преку неговата Фејсбук-страница, се вели во соопштението на ХЕРА.
Граѓанскиот суд утврдил дека здружението „Од нас за нас“ изнесувало неточни информации штетни за угледот на ХЕРА, организацијата која работи на подигање на јавната свест, особено кај младите, за важноста од добивање научно-засновани информации за нивната безбедност, добросостојба и репродуктивно и сексуалното здравје.
Судот постапувал по тужба за утврдување граѓанска одговорност за навреда и клевета што ХЕРА ја поднела минатата година.
„Апелираме до сите граѓани, а особено до родителите и младите да ги земат со голема доза на претпазливост и да ги проверуваат сите информации коишто на Фејсбук ги споделуваат здружението „Од нас за нас“ и нему сличните. Иако се претставуваат како заштитници на правата на децата, нивните објави за сеопфатното сексуално образование се полни со ксенофобија, расизам и нетолеранција и се базирани на теории на заговор поради што го загрозуваат јавното здравје и се косат со правото на децата да имаат пристап до точни информации, како и до знаења и вештини кои во иднина ќе им овозможат да бидат побезбедни и поздрави“,
се додава во соопштението на ХЕРА.