„Непостапувањето на институциите во случаи на очигледно насилство не само што ја охрабрува културата на неказнивост, туку директно го загрозува владеењето на правото и демократијата“, се вели во соопштението од Хелсиншкиот комитет за човекови права во врска со случајот
Итна и независна истрага и одговорност за полициските службеници кои не постапиле соодветно на местото на настанот. Ова се дел од барањата на Хелсиншкиот комитет за заштита на човековите права во врска со денешниот физички напад врз градоначалничката на Скопје, Данела Арсовска.
Оттаму најостро го осудуваат физичкиот и вербланиот напад врз Арсовска што се случи за време на увид во нелегален градежен објект во општината Чаир, ако особено загрижувачки го оценуваат тоа што инцидентот се случил пред полициски службеници, кои според изјавата на градоначалничката, не презеле соодветни мерки за нејзина зашттита.
Според сведочењето на Арсовска, напаѓачот ѝ се заканувал со силување и убиство на нејзините блиски, а потоа и физички ја нападнал, удирајќи ја со клоци.
„Наместо итна интервенција и заштита, полицајците кои биле присутни на лице место, наводно, не реагирале соодветно, дозволувајќи толпата да продолжи со навреди, физички напади и закани“,
велат од Хелсишкиот комитет.
Според невладината организација овој напад е уште еден алармантен пример со коис е соочуваат жените во јавниот живот – насилство, навреди, закани, клевети и институционална незаинтересираност.
Од Хелсиншки додаваат дека иако Министерството за внатрешни работи соопштило дека се приведени двајца напаѓачи, нема информации за мерки против полициските службеници кои биле присутни на местото на настанот.
„Оттука, Хелсиншкиот комитет за човекови права бара: Итна и независна истрага за случајот, одговорност за полициските службеници кои не постапиле соодветно на местото на настанот, кривични пријави против сторителите и соодветна постапка против нив, обезбедување ефективна и итна заштита за градоначалничката и другите службени лица кои биле нападнати и осуда на нападот од страна на сите политички и општествени чинители“,
наведуваат во соопштението од Хелсиншкиот комитет.
Во таа насока оттаму бараат, Одделот за внатрешна контрола, криминалистички истраги и професионални стандарди при МВР итно да го разгледа (не)постапувањето на полициските службеници и да преземе соодветни дејствија и мерки против нив.
Дополнително, Хелсиншкиот комитет за човекови права ги повикува сите надлежни институции во овој случај да дејствуваат итно и одговорно.
„Непостапувањето на институциите во случаи на очигледно насилство не само што ја охрабрува културата на неказнивост, туку директно го загрозува владеењето на правото и демократијата“,
наведуваат од Хелсиншки.
Претходно нападот на скопската градоначалничка го осудија од опозицискиот Социјалдемократски сојуз на Македонија и од советничката група на ВМРО-ДПМНЕ во Град Скопје.
Ставот на опозициската СДСМ на прес-конференција го соопшти портпаролката на партијата Богданка Кузеска, која рече дека овој брутален напад е последица на атмосферата на страв и беззаконие што ја создава актуелната власт.
Во кусото соопштението од ВМРО-ДПМНЕ, Советничката група на владејачката партија во Град Скопје порача дека секое насилничко однесување, притисоци и закани се неприфатливи и надвор од здравиот разум.
Оттаму бараат институциите да го расветлат случајот, се до конечно дознавање на вистината и утрдување на фактите.