Принцот Хари и неговата сопруга Меган Маркл објавија дека ќе се повлечат од кралските должности и ќе работат на тоа да бидат финансиски независни, продолжувајќи да ја поддржуваат кралицата. Во објавата на Инстаграм, двајцата велат дека одлуката ја донеле по многу месеци размислување и интерни разговори.
„Сега планираме да го балансираме нашето време меѓу Обединетото Кралство и Северна Америка, продолжувајќи да ја почитуваме нашата должност кон кралицата, Комонвелтот и нашите покровители. Овој географски баланс ќе ни овозможи да го израснеме нашиот син со почит кон кралската традиција во која е роден, а во исто време да му дадеме простор на нашето семејство да се фокусира на следното поглавје, вклучително и основање наш нов добротворен ентитет“, пишуваат Хари и Меган.
Повеќе детали за нивните планови најавуваат за во идниот период.
Кралицата и другите во семејството се разочарани и повредени
Британските медиуми јавуваат дека кралицата Елизабета Втора не била консултирана и дека е разочарана и повредена од постапката на Хари и Меган. Според Би-би-си, и други членови на семејството се чувствуваат повредени од овој потег.
Портпаролката на Бакингемската палата изјави дека дискусијата со војводата и војвотката за нивната одлука да се повлечат е во рана фаза додавајќи: “Ја разбираме нивната желба да преземат различен пристап, но ова се комплицирани прашања за кои треба време за да се решат“.