Израелската влада не ги коментираше веднаш ваквите информации. Меѓународниот комитет на Црвениот крст вчера објави дека го овозможил транспортот на посмртните останки на три лица од Појасот Газа до израелските власти за идентификација
Делумните останки на три тела во Газа, кои синоќа му беа предадени на Израел, не им припаѓаат на израелските заложниците кои сè уште се држат на палестинската територија, објавија израелските медиуми.
Израелската влада не ги коментираше веднаш ваквите информации. Меѓународниот комитет на Црвениот крст вчера објави дека го овозможил транспортот на посмртните останки на три лица од Појасот Газа до израелските власти за идентификација.
За разлика од претходните вакви акции, Хамас сега не објави дека ќе ги предаде останките на заложниците што милитантите ги држат во Газа.
Откако примирјето меѓу двете страни стапи во сила на 10 октомври годинава по две години војна, Хамас ослободи 20 живи заложници и ги предаде останките на 17 починати. Телата на 11 заложници сè уште се во Газа, вклучувајќи ги и телата на двајца странски државјани.
Примирјето постигнато со посредство на САД, кое остава нерешени прашања како што се разоружувањето на Хамас и временската рамка за повлекување на Израел од Газа, е нарушувано со повремени избувнувања на насилство.