И АФП и Ројтерс објавија дека извори од Хамас им потврдиле дека милитантната група се согласува со предлогот на медијаторите
Хамас прифати нов предлог од медијаторите во конфликтот во Газа, кој предвидува ослободување десет живи израелски заложници во замена за 70-дневен прекин на огнот и делумно повлекување на израелската армија од палестинската територија, објавија АФП и Ројтерс, повикувајќи се на извори блиски до милитантната група.
„Новиот предлог, кој се смета за спроведување на пристапот и визијата на американскиот претставник Стив Виткоф, вклучува ослободување на десет живи израелски заложници што ги држи Хамас во замена за 70-дневен прекин на огнот, делумно повлекување на израелската армија од Појасот Газа и ослободување на голем број палестински затвореници“,
изјавил изворот за АФП, додавајќи дека медијаторите го презентирале предлогот во последните неколку дена.
Во меѓувреме, и АФП и Ројтерс објавија дека извори од Хамас им потврдиле дека милитантната група се согласува со предлогот на медијаторите.
„Хамас прифати нов предлог од американскиот претставник Стив Виткоф добиен од медијаторите кој нагласува траен прекин на огнот во Појасот Газа“,
изјави изворот за АФП, додавајќи дека групата ги информирала медијаторите за својата одлука.
Палестински функционер близок до Хамас го потврди истото за Ројтерс.
Израел сè уште не коментираше за ова прашање, но израелската војска ги повика жителите на Газа да ги напуштат повеќето јужни населби додека се подготвува за „невидена офанзива“ против терористичките организации во областа. Наредбата за евакуација беше издадена на арапски јазик. Таа се однесува на големите градови како што се Рафах и Кан Јунис, но и на сите други населби во јужна Газа, според мапата објавена од војската.
На жителите на Газа им е кажано да се преселат во Ал Маваси, тесен појас на крајбрежно копно широк околу еден километар и долг 14 километри во југозападна Газа, кој беше прогласен за хуманитарна зона за време на војната.
Милитантите продолжија да испукуваат ракети од областите под наредба за евакуација, соопшти израелската војска, откако утрово пријави гранатирање од јужната палестинска територија.
Сепак, голем број смртни случаи беа пријавени во Кан Јунис, вториот по големина град во Појасот Газа, а војската повтори дека градот се смета за опасна борбена зона. Болницата „Насер“ и болницата „Ал Амал“ во Кан Јунис беа ослободени од наредбата за евакуација, соопшти војската.