„Двете држави се разликуваат по многу параметри. Во Македонија суровиот тутун е стратешка земјоделска култура, чии одгледување, производство и откуп се стимулирани од државата, а во земјата активно работат и две фабрики за производство на тутунски производи, кои имаат голем удел во приходите на државниот буџет, извозниот капацитет и вработуваат македонски граѓани“, се вели во реакцијата од ова тело
Предложениот нацрт-закон за заштита од пушењето е изработен според словенечки модел, но не може да биде применлив во македонски услови, реагираат од Групацијата за производство на цигари, која е дел од Здружението на производители на тутун и производи од тутун во рамките на Стопанската комора на Македонија.
Оттаму ја поздравуваат иницијативата на Министерството за здравство за модернизација на постојниот Закон за заштита од пушење, како нормален чекор кон адаптирање на домашната пазарна реалност, но сметаат дека вака предложениот нацрт-закон ќе создаде правна неусогласеност или ретроградност во усогласување со постојната законска регулатива, загрозување на индустријата, ќе нанесе удар врз малите и средни бизниси, а ќе ја поттикне и нелегалната трговија.
„Двете држави се разликуваат по многу параметри. Во Македонија суровиот тутун е стратешка земјоделска култура, чии одгледување, производство и откуп се стимулирани од државата, а во земјата активно работат и две фабрики за производство на тутнски производи, кои имаат голем удел во приходите на државниот буџет, извозниот капацитет и вработуваат македонски граѓани“,
се вели во соопштението од Групацијата.
Она што е заедничко со Словенија, според Групацијата, е тоа што државата како земја кандидат во ЕУ е под постојан мониторинг и евалуација на позитивносто законодавство од страна на телата на ЕУ задолжени за проширување, кои досега нотирале позитивен напредок и висок степен на усогласеност со ЕУ директивите, а еден таков закон е Законот за тутун, тутунски и сродни производи.
Како спорно во нацрт-законот, се посочуваат на изедначувањето на цигарите и алтернативните тутунски производи, кои, како што велат, веќе се јасно и одделно дефинирани во важечкото законодавство.
„Во контекст на споменатото е занемарувањето на бројни светски, регионални и локални истражувања кои докажале дека има значителна разлика меѓу цигарите и производите без чад“,
велат од Групацијата.
Предложеното законско решение, според нив, ќе има негативно влијание врз целокупната економија во земјата, на малите и средни претпријатија, угостителскиот и малопродажниот сектор, при што може да бидат загрозени над 4.000 малопродажни места, претежно мали и семејни бизниси. Дополнително, се очекува и поттикнување на нелегалната трговија со тутунски производи, што би резултирало со намалени приходи во државниот буџет.
„Слично е и со забраната на производи со ароми и вкусови, која, како и кај другите забрани, нема да доведе до намалување на бројот на пушачи, туку само до намалување на приходите и поттикнување нелегална трговија, што се покажа во повеќето земји во кои се забранети аромите и вкусовите, како што е и Словенија“,
пишува во реакцијата на Групацијата.
Како дополнителен проблем се наведува и недоволното прецизирање на локациите на кои е забрането и тие на кои е дозволено пушењето и користењето алтернативни тутунски производи, што, според Групацијата, ќе овозможи различни толкувања од страна на бројните инспекциски служби и реален проблем при спроведување на прописот.
Од Групацијата апелираат дека е неопходна темелна доработка и усогласување на нацрт-законот со македонската економска реалност и со принципите за намалување на штетноста.
Оттаму сметаат дека се потребни сериозни и сеопфатни консултации со сите засегнати страни, што ќе овозможи заштита на јавното здравје.