Груевски ќе се врати и ќе ја одлежи казната, порача министерот за внатрешни работи Оливер Спасовски во гостувањето на Телевизија 24.
Коментирајќи ја работата на МВР и критиките за бегството на експремиерот Груевски, Спасовски само кусо порача дека тој ќе се врати и ќе ја одлежи затворската казна.
– Сигурно? – праша новинарот.
– Да – одговори Спасовски.
Инаку, Министерството за правда во септември најави дека ќе испрати нови барања за екстрадиција на сторители на кривични дела, за кои има нови околности или обвиненија, а меѓу нив едно ќе биде и до Унгарија за да биде испорачан осудениот и обвинет во неколку предмет, експремиерот Никола Груевски.
Досега државата бараше негова екстрадиција откако Груевски избега пред да влезе во затвор на издржување на казната од три години во предметот „Тенк“ за набавката на блиндираниот „мерцедес“, а потоа и откако стана осомничен во истрагата за организацијата на настаните во Собранието од 27 април 2017 година.