Пратеникот на Демократската унија за интеграција, Артан Груби, во изјава за ТВ Сител вели дека тоа што неговата партија ќе го науми, тоа и ќе го оствари. Тоа го кажа во контекст на последните најави на лидерот на ДУИ, Али Ахмети, дека време е Македонија да добие премиер Албанец.
„Сметаме дека е дојдено време и сметаме дека ќе успееме. Тоа е последната работа за надминување на предрасудите. Македонските партии не се воодушевени, оти знаат дека што и да вети ДУИ тоа ќе го исполни. Тоа значи дека ниту еден од тие лидери на македонски партии нема да биде премиер, туку ќе биде личноста што ние ќе ја предложиме“,
вели Груби.
Тој истакна дека ниту Зоран Заев не победи на изборите во 2016 година, но ДУИ му помогна консензуално да седне во премиерската фотелја и токму поради оваа причина е убеден дека Македонија ќе има премиер Албанец.
„Тоа што ќе го вети тоа и ќе го оствари. Тоа го знаат и граѓаните Македонци, Албанци и сите други во нашата држава. Знаете првиот претседател на Собрание Албанец во нашата држава ги немаше потребните 61 глас само од страна на ДУИ туку мораше консензуално да се донесе одлука за да поддржиме личност како господинот Талат Џафери за претседател на Собранието. Исто така, господинот Зоран Заев не ги победи изборите во 2016 година туку имаше 49 пратеници и мораше да направи консензус со другите политички партии за да го добие мандатот за претседател на Владата. Затоа, со консензуалната политика којашто ја наметнавме при претседателските избори и при локалните последните избори сметаме дека таа консензуалност ќе надвладее и ќе успееме да имаме прв Албанец премиер на Македонија“,
вели Груби.