Од Судот велат дека мерката куќен притвор е определена бидејќи истрагата ја води Јавното обвинителството и согласно законските овластувања тоа оценува која мерка е соодветна и доволна за непречено водење на истрагата
Спроведувањето на мерката куќен притвор, со 24-часовен надзор, ќе го извршува Министерството за внатрешни работи (МВР)
Поранешниот прв вицепремиер и министер Артан Груби, кој по повеќе од една година бегство денеска самиот им се предаде на органите на прогонот, и формално исходот од постапката за случајот „Лотарија“, во кој е осомничен, ќе го чека во куќен притвор.
Од Основниот кривичен суд Скопје доцна вечерва соопштија дека судија на претходна постапка по сослушувањето на Груби донел решение со кое го прифатил предлогот на јавниот обвинител и одбраната за определување мерка куќен притвор со дополнителни мерки за обезбедување на неговото присуство.
Од судот во писменото соопштение наведоа и своевидна хронологија на настаните што уследија откако поранешниот прв вицепремиер денеска наутро се појави сам на граничниот премин „Блаце“ на македонско-косовската граница, по што беше спроведен во затворот „Скопје“ во населбата Шуто Оризари, бидејќи уште во декември 2024 година му беше одреден притвор откако побегна од земјата.
„Откако утрово КПУ затвор ‘Скопје’-Скопје го извести судот дека осомничениот А.Г. од 9:20 часот е спроведен во установата каде што започнал со издржување на мерката притвор, определена со решение од 17.12.2024 година, а стапува во сила од негово пронаоѓање односно лишување од слобода, судот за тоа го извести Основното јавно обвинителство и по нивно барање издаде наредба за спровод на осомничениот пред јавен обвинител за негово сослушување“,
се наведува во соопштението од Судот.
Во текот на денот, додаваат оттаму, одбраната на осомничениот Груби до судот доставила предлог за замена на мерката притвор со куќен притвор. Предлогот бил проследен до надлежното јавно обвинителство за да се произнесе по него.
Од Судот велат дека мерката куќен притвор е определена бидејќи истрагата ја води Јавното обвинителството и согласно законските овластувања тоа оценува која мерка е соодветна и доволна за непречено водење на истрагата. Во таа насока, од Кривичен информираат дека Обвинителството до судот доставило писмено известување, во кое дало позитивно мислење за предлогот на одбраната на Груби.
Дополнително, за време на сослушувањето, велат од судот, јавниот обвинител предложил на Груби да му биде определена поблага мерка за обезбедување присуство од онаа што претходно му беше одредена, односно притвор.
Спроведувањето на мерката куќен притвор, со 24-часовен надзор, ќе го извршува Министерството за внатрешни работи (МВР).
„Врз основа на сето тоа судот го сослуша осомничениот во присуство на негов бранител и донесе решение за замена на мерката притвор со мерка куќен притвор со 24-часовен надзор, којшто е доверен на Министерството за внатрешни работи, а дополнително определена е и мерка за претпазливост – одземање на патната исправа и забрана за издавање друг документ за преминување на државната граница“,
наведуваат од Кривичен.
Оттаму додаваат дека против решението на судијата на претходна постапка странките имаат право на жалба пред Кривичниот совет на судот.
Дека е предложено на Груби мерката ефективен притвор да му биде заменета со куќен притвор, претходно вечерва соопштија од Основното јавно обвинителство Скопје наведувајќи ги причините поради кои надлежниот јавен обвинител се решил на ваков чекор.
Имено, оттаму наведоа дека најголем дел од доказите биле обезбедени во текот на досегашната постапка, а било земено предвид и тоа што Груби доброволно се пријавил на органите на прогонот. Дополнително, според Обвинителството, постојат индиции дека на поранешниот висок државен функционер од редовите на ДУИ не може да му се гарантира личната безбедност во притворското одделение во затворот „Скопје“.
„По однос на мерките за обезбедување присуство на второосомничениот (во случајот ‘Лотарија’, н.з.) во понатамошниот тек на постапката Основното јавно обвинителство предложи замена на мерката притвор со мерка куќен притвор и одземање на патна исправа, имајќи го предвид фактот дека во најголем дел се обезбедени доказите во текот на постапката, дека истиот доброволно се пријавил на органите на прогонот, како и дека постојат индиции дека во притворското одделение не може да се гарантира неговата лична безбедност, кои индиции се поткрепени со известување од надлежните органи. Исто така, индициите за загрозената безбедност се однесуваат и на членовите на неговото семејство“,
наведоа во соопштението од Јавното обвинителство.
Со тоа беше повеќе од извесно дека Груби наместо во Шутка ќе оди во куќен притвор бидејќи судот не може да определи построга мерка од онаа што е предложена од Јавното обвинителство.
Груби, околу 18:30 часот вечерва, беше изнесен од зградата на Обвинителството со лисици на рацете и качен во комбе на затворската полиција, по што беше спроведен во Основниот кривичен суд Скопје.
Тој избегна да одговори на прашањата на новинарите зошто се вратил во земјава по повеќе од една година бегство и дали се чувствува виновен.
Артан Груби денеска наутро во 6:10 часот, како што соопшти Министерството за внатрешни работи, се појави на косовско-македонската граница при влез во земјава на граничниот премин „Блаце“, по што беше спроведен од полицијата.
Тој беше однесен во затворот „Скопје“, во населбата Шуто Оризари, а потоа оттаму однесен на распит во Основното јавно обвинителство Скопје.
На социјалните мрежи и во дел од медиумите беше објавено видео од приведувањето на Груби на „Блаце“ на кое се гледа како тој, со јакна со качулка на главата и очила за сонце, со насмевка им ги подава рацете на полициските службеници кои му ставаат лисици. Потоа се гледа, како тој со црн шал си ги покрива дланките.
Груби е второосомничен во случајот со проневери во „Државна лотарија“. Тој ја напушти земјава пред Обвинителството официјално да отвори истрага, а успеа да излезе од земјава и да влезе во Косово и покрај тоа што беше на т.н. „стоп-листа“. Груби тврдеше дека не избегал, туку дека бил во приватна посета на Косово, наведувајќи дека штом ги заврши обврските ќе се врати дома.
Првоосомничен во случајот е поранешниот директор на „Државна лотарија“ Перпарим Бајрами, кој сè уште е недостапен за органите на прогонот.