Дополнителни мерки кои Грција ќе ги преземе во областа Атика предвидуваат ограничување на бројот за време на приватни семејни собири, како и ограничување до девет лица за движење на отворено.
Заменик-министерот за цивилна заштита на Грција, Никос Хардаљас, денеска соопшти дека се откажуваат концерти и кино проекции во затворени сали, а дозволени се најмногу 20 лица на свадби, крштевки и погреби. Дури 40 отсто од вработени во приватниот и јавниот сектор задолжително ќе работат на далечина.
Мерките стапуваат на сила во понеделник, а ќе важат до 4 октомври и се донесени поради тоа што од 4 084 активни случаи во Грција, повеќе од половина, односно 2 100 се во областа Атика, а 966 се во општина Атина.
Хардаљас рече дека податоците покажуваат дека во конкретната област постои голема раширеност на коронавирусот меѓу вработени во приватниот сектор (29,07 отсто од заразените). Веднаш зад нив, се пензионерите и невработените со по 13 проценти.
Препораката на грчката Влада до оние кои се над 65 години или припаѓаат на ранливите категории е во следните 14 дена да ги ограничат движењата, да избегнуваат користење на јавен превоз и да избегнуваат контакти со други луѓе.
Во изминатите 24 часа во Грција се регистрирани 339 нови случаи на ковид-19, а починаа две лица, со што бројот на заразени се зголеми на 14 738, а на починати на 327 лица.