Шефот на грчката дипломатија Никос Дендиас бара вонреден состанок на Советот на министрите за надворешни работи на Унијата поради ситуацијата со мигрантите и бегалците која настана како резултат на тоа што Турција одлучи да ги отвори границите, а со тоа и нивниот пат кон европските земји.
Грчките медиуми јавуваат дека ова Дендиас го побарал од Високиот комесар на ЕУ за надворешна и безбедносна политика Жозеп Борел, со кого денеска телефонски разговарал. Според истите извори, Дендиас на оваа тема разговарал и до министрите за надворешни работи на Северна Македонија, Австрија, Бугарија и Турција.
Портпаролот на грчката влада денеска соопшти дека Грција вчера била мета на организиран, масовен и нелегален обид за преминување на границата про шти биле спречени да влезат над 4 000 мигранти. Граничниот премин Кастањес со Турција кај Еврос, веќе 24 часа е затворен, а од турска страна и понатаму се собрани бегалци и мигранти кои во текот на ноќта се судрија со полицијата.
Претставници на повеќе земји од ЕУ потврдија дека веќе прават меѓусебни консултации. Хрватскиот премиер Андреј Пленковиќ чија земја претседава со Унијата рече дека веќе разговарал со бугарскиот премиер Бојко Борисов, кој денеска патува во Турција и најави „политичко-дипломатски“ напори кон претседателот Ердоган за да се спречи посериозен миграциски бран кон Европа преку источномедитеранската и западнобалканската рута, но без да даде детали за какви напори се работи.
Ситуацијата стана тензична откако Турција одлучи да ги отвори границите за мигрантите кон Европа во знак на револт поради завчерашниот напад врз нејзините сили во Идлиб, Сирија, при што загинаа повеќе од 30 турски војници.
Македонското Министерство за внатрешни работи и граничната полиција изјавија дека будно се следат случувањата во Сирија и се подготвени да спречат влез на евентуален нов бран на бегалци и мигранти.