За време на конструктивната средба, како што соопшти владината прес-служба, се дискутирало околу одлуките што Владата на Северна Македонија ги донесе за да се остварат драстични промени во насока на отпочнување на преговарачкиот процес со ЕУ и влезот во НАТО, како и позитивниот пример што Северна Македонија го дава за земјите во регионот
Вицепремиерката за политики за добро владеење Славица Грковска, во рамки на работната посета на Вашингтон, САД, синоќа оствари средба со сенаторката Џин Шахин, претседавач со Поткомитетот за надворешни прашања за Европа и регионална безбедносна соработка на Сенатот. На средбата, како што информираат од Владата, било потенцирано дека поддршката на САД за интеграцијата на Северна Македонија во ЕУ е клучен сегмент за стабилноста на Балканот.
За време на конструктивната средба, како што соопшти владината прес-служба, се дискутирало околу одлуките што Владата на Северна Македонија ги донесе за да се остварат драстични промени во насока на отпочнување на преговарачкиот процес со ЕУ и влезот во НАТО, како и позитивниот пример што Северна Македонија го дава за земјите во регионот.
Меѓу другото, сенаторката отворено ја истакнала својата поддршка за што поскоро отпочнување на процесот за преговори со Европската Унија кои се од клучна важност, како за Северна Македонија така и за стабилноста и безбедноста во регионот.
„Вицепремиерката Грковска истакна дека одлуките што беа донесени се знак дека државата се движи во вистинска насока кон остварување на поставените цели, а за само три години беше постигнато толку многу што Северна Македонија стана полноправна членка на НАТО-алијансата и сега веќе се наоѓаме во финалето за преговори со ЕУ. Таа дополни дека нашата држава е успешна приказна во регионот и ја истакна својата благодарност за целата поддршка во процесот на интеграции од страна на САД“,
стои во владиното соопштение.
На средбата се разговарало и за една од најактуелните глобални теми – сајбер безбедноста при што вицепремиерката Грковска, чиј еден од клучните фокуси е токму процесот на дигитализација, накратко информирала за сите отворени и претстојни процеси во доменот на дигитализацијата и сајбер безбедноста.