Вицепремиерката Грковска информирала дека презема мерки за редовна координација со сите институции кои се значајни, не само во делот на креирање антикорупциски политики и мерки, туку и во делот на нивно имплементирање со цел ефективно справување со корупцијата
Сите институции треба сериозно да го земат предвид Извештајот на Европската комисија за напредокот на Северна Македонија и да се посветат на унапредување на ефикасноста и одговорното работење, е заклучокот од денешната средба меѓу заменичката на претседателот на Владата задолжена за политики за добро владеење, Славица Грковска и амбасадорот на Европската Унија во земјава, Дејвид Гир.
Грковска, како што соопштија од Владата, изразила благодарност до амбасадорот Гир за поддршката што Европската комисија и ја дава на земјава во процесот на преговорите за членство во Европската Унија, додека амбасадорот на ЕУ истакнал дека Европската комисија посветува посебно внимание на антикорупциските политики кои како област се опфатени во речиси сите поглавја на преговарачкиот процес.
„Во тој контекст, вицепремиерката Грковска информираше дека презема мерки за редовна координација со сите институции кои се значајни, не само во делот на креирање антикорупциски политики и мерки, туку и во делот на нивно имплементирање со цел ефективно справување со корупцијата“,
се наведува во соопштението за средбата.
Грковска нагласила дека ефикасните антикорупциски политики и справувањето со корупцијата и организираниот криминал се врвен приоритет на Владата, но, за да има успешни мерки кои даваат резултати мора да се обезбеди сеопфатен и координиран пристап и најважно „целосна посветеност од страна на сите институции“.
„Двајцата соговорници се осврнаа и на процесот на дигитална трансформација на општеството, кој исто така е важен за унапредување на капацитетите на институциите во поглед на услугите што им ги пружаат на граѓаните, но и во однос на ефикасни антикорупциски мерки“,
се додава во соопштението.