„Се обидуваме да најдеме битни решенија за пристапот кон оваа енергетска криза. Непријатно ни е и искрено се извинуваме“, рекоа подоцна од компанијата
Третиот по големина британски снабдувач со енергија се извини откако „ги советуваше“ своите корисници „да ги гушкаат миленичињата“ за да се загреат и да заштедат на сметките.
Оваа недела, „Ово енерџи“ (Ovo Energy) на своите клиенти им испрати список со десет „лесни и економични начини“ како да се стоплат оваа зима. Покрај гушкањето со миленичињата, на корисниците им се советуваше да ги предизвикуваат децата на натпревар во хула-хоп, да прават разни вежби, па и да ги исчистат своите домови.
За препораките од британската компанија коментираше и Дарен Џонс, член на британскиот Парламент и претседател на Комитетот за бизнис, енергија и индустриска стратегија, нарекувајќи со списокот со совети навредлив и ја повика компанијата да се извини.
„Не знам баш кој ја одобри маркетинг-кампањата која ги советува луѓето дека ако не можат да си дозволат греење треба да носат џемпери и да јадат каша“,
напиша Џонс подоцна на Твитер.
Компанијата во меѓувреме се извини за содржината, нарекувајќи ја „лоша проценка“.
„Разбираме колку тешка ќе биде ситуацијата за многу наши корисници оваа година. Се обидуваме да најдеме битни решенија за пристапот кон оваа енергетска криза. Непријатно ни е и искрено се извинуваме“,
соопштија тие за „Фајненшл тајмс“ (Financial Times).
Сето ова се случува во време кога се очекува раст на цените на енергијата и животните трошоци во Велика Британија. Според некои прогнози, сметките за гас и струја може да се зголемат за повеќе од 50 отсто за милиони домаќинства во април.