На протестот излегуваат и вакцинираните здравствени работници затоа што знаат дека ќе бидат повикани да ги пополнат празнините што ќе ги остави суспензијата на вработените што не се вакцинирани
Синдикатот на здравствените работници вработени на грчките државни болници (ПОЕДИН) денеска во центарот на Атина ќе организира протест против задолжителната вакцинација на здравствените работници против ковид-19, пишува „Катимерини“.
ПОЕДИН, исто така, ги повика своите вакцинирани членови да не ги покажуваат своите сертификати за вакцинација пред властите со цел да спречат создавање регистар што покажува кои здравствени работници се вакцинирани против коронавирусот, а кои не.
Покрај тоа, ПОЕДИН објави дека ќе поднесе барање за суспензија и укинување на законот за задолжителна вакцинација до Државниот совет, највисокиот административен суд во земјата.
Според синдикатот, работниците што штрајкуваат, од кои многумина се вакцинирани, не го прават тоа од солидарност, туку затоа што знаат дека ќе бидат повикани да ги пополнат празнините што ќе ги остави суспензијата на вработените. Се вели дека 90 отсто од здравствените работници се вакцинирани или имаат создадено природен имунитет.
Претседателот на ПОЕДИН, Михалис Јaнакос, за „Катимерини“ изјави дека синдикатот поддржува вакцинација, нагласувајќи дека не се согласува со екстремните ставови на здравствените работници кои се против вакцината. Она што тие го сакаат, рече тој, е да им дадат повеќе време на своите колеги да се убедат.
„Се разбира, секој треба да се вакцинира, не сакаме да испратиме порака дека не треба да се вакцинираме“,
рече тој.