Државјанство ќе се добива и во случаи кога Р Албанија има национален интерес или интерес во областа на образованието, науката, уметноста, културата, економијата и спортот
За да добијат албанско државјанство, граѓаните од Северна Македонија и Косово нема да мора да полагаат тестови за познавање на албанскиот јазик и историја. Ова е дел од измените на Законот за државјанство кои со 97 гласа „за“ беа усвоени во албанскиот парламент.
„Граѓаните на Косово и С Македонија, каде што албанскиот е официјален јазик и го зборуваат јазикот како и ние, добро ја знаат нашата историја исто како и како ние, да не мора да подлежат на тест за јазик или познавање на историјата“,
рече министерот за внатрешни работи на Албанија, Таулант Бала.
Министерот додаде дека граѓаните на земја во која албанскиот е официјален не мора да ги полагаат овие тестови.
„Ова одлука би ја нарекол историска за унапредување на одговорноста што ја има матичната земја за оние што аплицираат за пасоши со натурализација“,
рече министерот за внатрешни работи на Албанија.
Право на албанско државјанство можат да добијат и родителите на дете родено во Албанија доколку непрекинато живееле на територијата на земјата најмалку три години, без разлика дали го познаваат или не албанскиот јазик.
Странецот, чие малолетно дете има албанско државјанство, може да поднесе барање за стекнување државјанство со натурализација иако не го исполнува условот за познавање на албанскиот јазик доколку легално и континуирано престојувал на територијата на Република Албанија најмалку три години.
Државјанство ќе се добива и во случаи кога Република Албанија има национален интерес или интерес во областа на образованието, науката, уметноста, културата, економијата и спортот.