Во однос на граѓаните кои го платиле данокот на доход во странство, а сега постапиле по даночните решенија на УЈП и извршиле повторно плаќање, директорката на Управата вели дека ќе бидат земени предвид сите докази и ќе се утврди дали со земјата каде што е платен данонот е склучен меѓународен договор каде треба да се изврши уплатата
Граѓаните кои го платиле данокот од доходот во странство, а кои сега добиле даночно решение од Управата за јавни приходи, може да обезбедат докази за платениот данок и да ги достават до даночните канцеларии на УЈП.
Ова на денешната прес-конференција го изјави директорката на Управата, Елена Петрова, уверувајќи дека нема да има двојно оданочување бидејќи, како што рече, Законот за данок на личен доход и меѓународните договори со странските земји обезбедуваат механизми со кои се спречува двојно плаќање данок за ист доход во две земји, исто како што спречуваат данокот да не биде платен во ниту една земја.
„Сите што имаат и што можат да ги обезбедат доказите да ги достават до сите даночни канцеларии на УЈП, ние ќе ги разгледаме и што може ќе биде прифатено. Доставените решенија мораше да бидат поднесени до 31 декември, тоа се аконтативни решенија и врз основа на дополнително доставените докази ние треба да преминеме кон коригирање на годишната даночна пријава за 2020 година односно на конечниот данок за 2020 година, а потоа ќе следат постапки за наплата. Сè уште има период во кој граѓаните доколку имаат докази, можат да ги достават“,
изјави директорката на УЈП на денешната прес-конференција.
Во однос на граѓаните кои го платиле данокот на доход во странство, а сега постапиле по даночните решенија на УЈП и извршиле повторно плаќање, Петрова рече дека ќе бидат земени предвид сите докази и ќе се утврди дали со земјата каде што е платен данонот е склучен меѓународен договор каде треба да се изврши уплатата.
„Или доколку е возможно, платениот данок во странство да се прифати како даночен кредит, а на уплатата што е извршена овде да се изврши враќање или да се прифати за друг долг за следна година на соодветното лице“,
додаде Петрова.
Вели дека како институција се свесни за реакциите на граѓаните, но додаде дека морале да го почитуваат законот и да ги достават решенијата во законкиот рок, односно пет години по истекот на годината кога доходот е остварен. Во однос на најавите на дел од граѓаните дека ќе поднесат тужби пред Управниот суд, директорката на УЈП вели дека тоа е легитимно право на граѓаните и повторно ги повика да достават доказ за платениот данок во странство.
„Сите податоци со кои УЈП располага по службена должност беа обезбедени од банките, детално анализирани и селектирани за да се издвојат доходите кои според описот се оданочиви, за да се види кои граѓани веќе ги имаат пријавено своите доходи. По сето тоа, над 11 000 граѓани персонализирано беа повикани да поднесат самите пресметка за својот доход или ако сметаат дека доходот не подлежи на оданочување или имаат соодветен доказ да го поднесат до УЈП и со тоа да се вклучат во докажувањето и појаснувањето на фактичката состојба“,
додава таа.
Од овие 11 000 граѓани, како што рече директорката на УЈП, досега е утврден данок за 6 600 граѓани за 2020 година, а за останатите е констатирано дека доходот не подлежи на оданочување. Од тие 6 600 граѓани, 2 200 самите го пресметале и го пријавиле данокот, а за 4 400 граѓани се донесени решенија по службена должност и вкупно утврдениот данок е околу 186 000 000 денари, односно околу 3 милиони евра за 2020 година
„Апелирам граѓаните да си ги обезбедат доказите и за другите години бидејќи ќе го утврдуваме данокот и за периодот од 2021 до 2025 година и отсега натаму редовно да си ги пријавуваат доходите од странство. Доходот се пријавува по истекот на месецот до 10. следниот месец освен доходите од плата и пензија кои се пријавуаат до 31 март по истекот на годината. Дури и кога е платен данокот во странство, тој мора да биде пријавен за да можат тие граѓани да влезат и системот да ги препознава како граѓани кои остваруваат доход“,
додаде Петрова.
Покрај директорката на УЈП, на денешната прес-конференција се обрати и министерката за финансии Гордана Димитриеска-Кочоска, која рече дека не се работи за никаква законска измена туку дека граѓаните треба да ги знаат своите обврски кон државата и да ги почитуваат.