Претседателот на СДСМ, Венко Филипче, вечерва изјави дека партијата ги избрала најдобрите кандидати за градоначалници и оти во првиот круг од локалните изборите ќе настапат со свои кандидати
Филипче рече дека во моментов немаат никаква соработка со опозициската ДУИ, додаде оти тие не ја рехабилитираат ДУИ и оти ги научиле лекциите од таквите коалиции
„Ќе им ветам уште сега на скопјани дека во Скопје никогаш нема да се повтори состојба каква што е сега со градоначалничката поддржана од ВМРО-ДПМНЕ“, вели тој
На локалните избори ќе постигнеме оптимум, изјави вечерва во гостување на ТВ Сител, претседателот на опозицискиот Социјалдемократски сојуз на Македонија (СДСМ), Венко Филипче.
Тој дополни дека партијата ги избрала најдобрите кандидати за градоначалници и оти во првиот круг од изборите ќе настапат со свои кандидати.
„Засега сме фокусирани на првиот круг од изборите каде настапуваме со наши кандидати. Ги избравме најдобрите кандидати. Сметам дека тоа се кандидати кои потекнаа од своите средини. Луѓе кои имаат и кредибилитет и легитимитет да излезат пред граѓаните, да ги презентираат програмите“,
рече Филипче.
Филипче изјави дека во моментов немаат никаква соработка со опозициската Демократска унија за интеграција (ДУИ) и додаде оти тие не ја рехабилитираат ДУИ и оти ги научиле лекциите од таквите коалиции. Вели дека сега коалицирањата се темелат на вредносни политики и програми.
„Ја научивме лекцијата и тоа е добра лекција. Сега ја користиме во градењето на коалициите со сите политички партии. Но дефинитивно го гледаме тоа приближување, функционирање меѓу ДУИ и ВМРО-ДПМНЕ“,
рече Филипче.
Во однос на независните кандидатури, претседателот на СДСМ кажа дека тие дале поддршка за намалување на бројот на потписи за кандидирање, но дека владејачкото мнозинство не се обидело да ги собере потребните гласови за Бадентерово мнозинство. Тој појасни дека независните кандидати ќе бидат непрепознатливи на гласачките ливчиња бидејќи пред нивното име ќе стои само „група граѓани“, но не и кој ги поддржува.
Филипче рече дека се согласува со констатацијата дека дел од независните кандидати може да повлечат дел од гласовите на СДСМ. Додаде дека е важно тие да се вистински независни и оти СДСМ има сомнежи за бизнис и политички влијанија, особено во Општина Центар, за што, како што најави, ќе изнесат информации во следниот период.
Лидерот на СДСМ рече дека програмите за претстојните локални избори се креираат според потребите на општините. Сепак, неколку нешта ќе ги обединуваат сите програми – безбедноста, осветлувањето улици и хигиената.
„Ќе им ветам уште сега на скопјани дека во Скопје никогаш нема да се повтори состојба каква што е сега со градоначалничката поддржана од ВМРО-ДПМНЕ, а тоа што јас го гарантирам за секој еден наш кандидат е дека ќе биде чесен“,
рече Филипче.
Филипче смета дека во отсуство на реални резултати, владејачката партија целосно се потпира на дезинформации и медиумски спинови поврзани со него. Според него, граѓаните веќе чувствуваат последици од, како што рече, неспособноста на власта посочувајќи на зголемувањето на цените, слабите економски политики и немањето визија. Рече дека СДСМ останува фокусиран на реалните проблеми и на борбата за економски и социјален напредок.