Граѓаните кои имаат симптоми како сува кашлица, отежнато дишење или температура, телефонски да се пријават кај матичниот лекар, кој ќе одлучи дали има потреба да се земе брис за тестирање од коронавирусот, порача на денешната прес-конрефенција во одговор на новинарско прашање заменик-министерот за здравство Арменд Арслани.
Откако пациентот со горенаведените симптоми ќе се јави, матичниот лекар ќе спроведе анкета од 10 прашања и тоа преку даден алгоритам, за да се утврди евентуална појава на коронавирусот кај пациентот.
„Апелирам пациентите да даваат точни одговори. После анкетата на матичниот лекар, понатаму ќе се направи епидемиолошка анализа и повторно матичниот лекар ќе даде препорака доколку смета дека треба да се направи тестирање тоа да се случи во еден од пунктовите“,
рече Арслани.
Тој вели дека министерството за здравство е во постојан контакт со матичните лекари. Во функција за поддршка на граѓаните е и бесплатниот број на контакт центарот на Министерството за здравство 0800 002 03 на кој може да се добијат сите потребни дополнителни информации, како и информации за тоа како да се закаже тестирање и други препораки во однос на коронавирусот.