Противпожарните екипи пронашле запалени гуми
Градоначалникот на Општина Желино, Блерим Сејдиу, денеска за ТВ 21 изјави дека се сомнева дека пожарот во границите на општината, во близина на автопатот Скопје-Тетово, е намерно предизвикан. Веќе ги информирал и тетовското обвинителство и тетовската полиција.
„Врз основа на нашите информации и информациите од Противпожарната служба на Тетово, тие наидоа на три запалени гуми, за кои се сомневаме дека се намерно фрлени овде и работиме со обвинителството во Тетово и со полицијата во Тетово за да ги пронајдеме сторителите на овој гнасен чин“,
рече Сејдиу.
Како што соопштија попладнево од Центарот за управување со кризи и од Дирекцијата за заштита и спасување, пожарот избувна на територијата на Општина Желино, кон селото Еребино. Од 13:15 часот е затворен за сообраќај регионалниот пат Тетово – Скопје, на потег од Добарски надвозник до бензинската пумпа „Џезо петрол“, и тој се пренасочува по автопатот Тетово – Скопје – Тетово, кај селата Групчин и Желино.
Последните информации што ги сподели Центарот за управување со кризи се дека пожарот се движи во правец кон Еребино, зафаќајќи сува вегетација и нискостеблеста шума. Поради ветрот и тешкиот терен, има ризик да се прошири.
На самото место се и директорот на Центарот за управување со кризи, Мухамед Али, како и градоначалникот на општина Желино, Блерим Седиу, кои ги координираат активностите за справување со пожарот. На пожарот активно дејствуваат:
- 1 армиски хеликоптер
- 1 полициски камион МАН со цистерна од 8 тони и воден топ
- 2 теренски возила пинцгауер
- 1 хермелин
- 30 припадници на Армијата
- Екипи од Скопската бригада за противпожарна заштита
- Пожарникари од ТППЕ Тетово.
Во 16 часот требаше да полетаат и два „ертрактори“ на ДЗС за воздушна поддршка