Населените и туристичките места веднаш биле евакуирани, со оглед на тоа што од бројот 112 за итни случаи била испратена порака до сите што се во конкретната област да се евакуираат кон Никити
Шумскиот пожар на вториот крак на Халкидики во регионот на Вурвурy е ставен под контрола. Не постои никаква опасност за туристичките сместувачки капацитети или домовите во Ситонија. Посетителите и жителите можат да останат мирни, бидејќи ситуацијата е нормализирана, напиша на Фејсбук градоначалникот на општината Јоанис Малинис.
Малинис додаде дека постоела масовна мобилизација и благодарение на брзата интервенција на силите на противпожарната служба, волонтерите, полицијата, Министерството за цивилна заштита и поддршката од воздушните средства, пожарот е ставен под контрола.
Пожарот избувна околу 16 часот по локално време во густа борова шума, во непрооден дел, а вечерва дополнително беа засилени противпожарните сили.
Според противпожарната служба на Грција, во гаснењето учествуваат 160 пожарникари со седум пешадиски тима, 49 возила, волонтери, помагаат и цистерни од општините, а интервенирале и 14 авиони и пет хеликоптер.
Населените и туристичките места веднаш биле евакуирани, со оглед на тоа што од бројот 112 за итни случаи била испратена порака до сите што се во конкретната област да се евакуираат кон Никити.
Дополнително евакуиран бил и еден камп.
Поради пожарот во прекин е сообраќајот на патот Неа Мудања – Спарти од Ормос Панагиас до Вурвуру, а од полицијата ги повикаа возачите да бидат особено внимателни и да ги следат упатствата од полицајците.