Во бразилската сојузна држава Рио де Женеиро со 17 милиони жители, од ковид-19 починале околу 40 000 луѓе, а во изминатите 24 часа се потврдени 300 смртни случаи
Градоначалникот на Рио де Женеиро, Едуардо Паеш изјави дека повторно е заразен со коронавирусот, речиси една година по првата инфекција.
„За жал, позитивен сум“,
истакна Паеш на видео – снимката објавена на Твитер, додавајќи дека има симптоми слични на грип.
Тој нагласи дека е во својот дом и ги повика Бразилците да се чуваат.
Паеш првпат бил заразен со ковид-19 во мај лани и тогаш немал симптоми на болеста.
Градоначалникот (51) се уште не примил вакцина против коронавирусот, бидејќи не се наоѓа во приоритетна група. Моментно вакцината ја примаат лицата на 60-годишна возраст.
Во бразилската сојузна држава Рио де Женеиро со 17 милиони жители, од ковид-19 починале околу 40 000 луѓе, а во изминатите 24 часа се потврдени 300 смртни случаи.
Бразил е една од најтешко погодените земји од пандемијата, со голем број заразени и починати, заедно со САД и Индија.
Претседателот на Бразил Жаир Болсонаро постојао агитира против мерките на заштита и ги поттикнува Бразилците да не се затвораат, туку да излегуваат и на тој начин да овозможат колективен имунитет.