Пецаков вели дека имало реакции и од туристички работници на чии гости од летовите од Амстердам и Карловица вчера им било потребно час и половина да стигнат од охридскиот аеродром до хотелите, исто колку што им било потребно да стигнат до земјава
Од Министерството велат дека реакциите на градоначалникот на Општината се лицемерни и неприфатливи посебно кога „станува збор за истиот градоначалник кој постојано повикува на забрзување на градежните работи на истиот автопат“. Автопатот, нагласуваат, се гради со потребната динамика и нема да дозволиме ничија опструкција да ја блокира реализацијата на овој проект
Градоначалникот на Општина Охрид, Кирил Пецаков, ги повика институциите да го одложат работењето на автопатската делницата Подмоље-Охрид за крајот на септември, односно по завршувањето на туристичката сезона бидејќи вака се прави хаос во сообраќајот и ќе има огромни колони возила. Министерството за транспорт и врски (МТВ), пак, реагира дека е нејасно зошто бара да не се гради и вели дека реакциите му се лицемерни.
Поради изградбата на автопатската делница, според изјавата на Пецаков, се затвора влезот на градот и возилата се пренасочуваат по стариот пат поради што се создаваат колоните и се предизвикува нетрпеливост кај возачите.
Во изјавата дадена за МИА, охридскиот градоначалник посочува дека иако имале состанок со изведувач, инвеститор и СВР Охрид и на него Општината и полицијата биле на ист став дека затворањето на главниот влез во Охрид и пренасочување по стариот пат, кој нема капацитет да прима толкав број возила, ќе создаде огромни метежи и проблеми во сообраќајот, посебно во летниот период, сепак, одлуката не била испочитувана.
„Кога не ги почитуваат одлуките од состанокот, ги повикувам јавно министрите за транспорт и врски и за внатрешни работи и премиерот, ги замолувам сите работни активности околу влезот на Охрид, да се реализираат по завршување на туристичката сезона, односно по 15 септември“,
вели Пецаков.
Покрај од граѓаните, тој нагласи дека денеска имало реакции и од туристички работници, на чии гости од летовите од Амстердам и Карловица вчера им било потребно еден и час и половина да стигнат од охридскиот аеродром до хотелите, исто колку што им било потребно да стигнат до земјава.
„Рокот за градба е 45 дена, но ветувањата се дека ќе работат во две смени и за 30 дена дека ќе бидат завршени градежните активности, но гледајќи ја динамиката во овие 7-8 години како се работи на патот, тие 30-40 дена лесно ќе бидат многу повеќе. Тоа ќе ја опфати цела туристичка сезона, а со тоа и хаосот во сообраќајот, односно во пристапот на туристите и на граѓаните во Охрид ќе биде катастрофален“,
забележува Пецаков.
За МТВ, пак, нејасни се реакциите на градоначалникот.
„Поддршката од централната власт кон општина Охрид е огромна, како никогаш досега, а реакциите на градоначалникот на Општината се лицемерни и неприфатливи посебно кога станува збор за истиот градоначалник кој постојано повикува на забрзување на градежните работи на истиот автопат. Автопатската делница од Кичево до Охрид се гради со потребната динамика и нема да дозволиме ничија опструкција да ја блокира реализацијата на овој проект“,
велат од МТВ.
Оваа несфатлива реакција, додаваат од Министерството, доаѓа од градоначалник од политичката партија која остави хаос на истиот автопат, а сега истите тие грчевито се борат тој автопат да не се изгради.
„Пецаков треба да има предвид дека се отстранија сите проблеми на оваа делница кои ги затекнавме од времето кога ВМРО-ДПМНЕ ја предводеше владата. Благодарение на напорите и пристапот на оваа Влада се решија најголемите проблеми и се решија преку 3500 имотно правни пречки помеѓу државата и граѓаните. Се испроектираа и клучките, се репроектираа косините со што денеска има прогрес на терен“,
пишува во реакцијата од МТВ.