Трајановски, пак, ги отфрла ваквите наводи, тврди дека работел согласно законот и смета оти се работи за негова политичка дискредитација
Град Скопје поведе постапка до Државната комисија за спречување на корупцијата (ДКСК) против поранешниот скопски градоначалник Коце Трајановски бидејќи, како што објави МИА, со пари од градскиот буџет се снимале видеа, а снимките потоа ги користел во политичка кампања пред изборите.
Градските власти во барањето наведуваат дека се работи за случај на прекршување одредби од склучен договор исплатен од Буџетот на Град Скопје со цел водење политичка кампања за локални избори. Постапката е поведена минатата недела.
„Откако минатата недела ВМРО-ДПМНЕ обвини за корупција во Договорот со дроновите, ги пребаравме сличните договори што ги склучувал Градот и видовме дека во 2017 година Градот склучил петпати поскап договор од оној во 2016 година. Клопчето почна да се одмотува. Разгледувајќи ги доставените материјали забележавме дека ни се познати и ги најдовме кадрите дека се користени во изборен спот на ВМРО-ДПМНЕ, на Коце Трајановски“,
велат за МИА од Град Скопје.
Оттаму истакнуваат дека засега немаат информации за други или слични случаи и додаваат оти не се истражен орган.
„Кога ќе увидиме некоја потенцијална криминална активност, тогаш пријавуваме. Ќе продолжиме да бараме дали и други ресурси на Градот се користени во изборни цели на политички партии и ако е тоа така, веднаш ќе пријавиме“,
информираат за МИА од Град Скопје.
Трајановски, пак, во одговорот кој го доставил до МИА, ги отфрла ваквите наводи, тврди дека работел согласно законот и смета оти се работи за негова политичка дискредитација.
„Ниту јас, ниту Град Скопје, односно институцијата со која раководев до октомври 2017 година не го нарачала, ниту изработила тој спот и сè што сум работел до крајот на мандатот било согласно законските прописи. Затоа за бараните информации треба да се обратите кај тој што го изработувал тој видеозапис. Очигледна е намерата на актуелната градска власт за моја политичка дискредитација во недостиг на исполнување на ветувањата за кои беа донесени на власт“,
вели Трајановски во писмената изјава.
Во барањето за поведување постапка се наведува дека на 13 април 2017 година Град Скопје, во својство на договорен орган, склучил Договор со „Енигма Солушн ДООЕЛ“ како носител на набавка за видеоснимање на секојдневна и месечна основа и видео-фото документација за потребите на Град Скопје.
Вредноста на договорот, информираат за МИА од Град Скопје, изнесувала 2 136 000 денари без пресметан ДДВ, со вкалкулиран попуст од 11 отсто од електронска аукција. Вкупната вредност на договорот изнесувала 2 520 480, со пресметан ДДВ. Носителот на набавката за потребите на Град Скопје, ги вршел услугите сукцесивно, секој месец во текот на траењето на договорот.
„Согласно Техничката спецификација, која е составен дел на Договорот, снимениот видеоматеријал и фотографиите остануваат авторска сопственост на Град Скопје. Покрај обработениот видеоматеријал и необработениот материјал и фотографиите согласно договорот остануваат сопственост на Град Скопје. По завршувањето на договорот, операторот требал целокупниот материјал предвиден со договорот на екстерен хард-диск да го достави до Град Скопје и овој услов бил исполнет и целокупниот материјал е предаден на градските власти“,
пишува МИА.
По сознанијата до кои сега дошол Град Скопје, дел од видеоматеријалот, предмет на овој договор е искористен во видеоспот како платена политичка програма во 2017, од страна на тогашниот кандидат за градоначалник на Град Скопје, Коце Трајановски.
За таа цел до ДКСК се доставени Договорот и фактурите и извештаите за извршената услуга-предмет на набавката, видеата кои ги снимала фирмата за Град Скопје и видеоспотот од изборната кампања каде се користат кадри кои според договорот се сопственост на градските власти.