Во реакцијата од Град Скопје обвинуваат дека сопственикот на „Пуцко петрол“, Асмир Јахоски, е под „силен политички притисок“ и дека се приклучува во обидите за креирање хаос во Скопје
Испораката на нафта за ЈСП „Скопје“ е прекината и покрај тоа што постои активен договор што претпријатието го има со „Пуцко петрол“, велат од Град Скопје.
Во реакцијата од Град Скопје обвинуваат дека сопственикот на „Пуцко петрол“, Асмир Јахоски, е под „силен политички притисок“ и дека се приклучува во обидите за креирање хаос во Скопје.
„Иако има активен договор со ЈСП за испорака на нафта, Асмир Јахоски од ’Пуцко петрол’, соочен со обвиненија за затворска казна и подложен на уцени, иако има активен договор за испорака на нафта, ја прекина доставата“,
велат од Град Скопје.
Оттаму велат дека ќе покренат соодветна материјална и кривична одговорност кои произлегуваат како последица на непочитувањето на договорот.
„Затоа за Асмир Јахоски и ’Пуцко петрол’ ќе се покрене соодветна постапка за материјална и кривична одговорност кои произлегуваат како последица од непочитување на договорот за снабдување со нафта, со што имаат цел автобусите на ЈСП да престанат да сообраќаат“,
се вели во соопштението.
Според Град Скопје, ова не е првпат „Пуцко петрол“ да ја прекине испораката, што се случило и пред новогодишните празници. Со тоа, тврдат од Градот, граѓаните се оставени да чекаат на студ или на жега, само за да се задоволат „суетните лидери од кои очекуваат спас од сургун за своите недела уценетите црнолисташи“.
Во соопштението се наведува дека ВМРО-ДПМНЕ, преку својот Управен одбор во ЈСП „Скопје“, и Христијан Мицкоски заедно со Јахоски, сакаат да ја дефокусираат јавноста од штетата која, според нив, е нанесена на претпријатието и на градот во изминатите четири години.
Градот Скопје нагласува дека ВМРО-ДПМНЕ спречило набавка на нови автобуси и не гласало за бесплатен јавен превоз.
Од Град Скопје порачуваат дека нема да дозволат „идиотските криминогени постапки на уценети бизнисмени“ да им наштетат на граѓаните.
„360 степени“ се обиде да стапи во контакт со директорот на ЈСП „Скопје“ за да ни каже колку нафта има во претпријатието и за колку дена таа е доволна, како и за тоа дали на Скопје повторно му се заканува да остане со половичен јавен превоз, но тој не одговори на нашите повици.
Инаку, минатата година во ноември проблемот со јавниот превоз во Скопје стана алармантен откако автобусите на ЈСП „Скопје“ престанаа да возат поради немање нафта. Низ скопските улици можеше да се забележат само оние автобуси што возат на метан.
За надминување на проблемот, Владата на вонредна седница донесе одлука со која се утврдува постоење кризна состојба во снабдувањето со топлинска енергија на подрачјето на град Скопје, поради недостиг на топлинска енергија, можноста за користење на алтернативно гориво и состојбите на пазарот на топлинска енергија.
Со таа одлука на Град Скопје му беше позајмено гориво за седум дена од државните нафтени резерви. Резервите на нафта што Владата ги отстапи од државните резерви беа доволни за седум дена, а во меѓувреме беше распишан нов тендер за набавка на нафта за ЈСП „Скопје“ по поништувањето на првиот тендер, поради што главниот град се најде во ваквата ситуација.
Во декември во медиумите беше објавено дека во ЈСП „Скопје“ било одлучено да се реализира интервентна набавка на нафта во вредност од 120 милиони денари без ДДВ. Набавката е извршена од „Пуцко петрол“, кој бил единствениот понудувач.