По информацијата од Антикорупциската комисија дека градоначалничката Данела Арсовска ја злоупотребила службената положба и незаконски го назначила директорот на Зоолошката градина, од Град Скопје велат дека членовите на ДКСК се занимаваат со тривијалности и исполнуваат политички агенди.
„Секако, за барање на корупција онаму каде што навистина постои сомнеж треба и храброст. Одлика, која за жал не ги краси членовите на Антикорупциската комисија. Добро е сепак што ДКСК поднеле кривична пријава за која воопшто Град Скопје не е известен, а дознаваме од медиумите, за еднаш да се расчисти маглата која ја сеат разни политиканти. Членовите на ДКСК ќе мора да ја докажат и сопствената надлежност во постапувањето по овој предмет пред соодветна судска инстанца“,
реагираат од Град Скопје.
Претходно ДКСК утврди дека Арсовска незаконски го именувала Драган Илиевски за в. д. директор на Зоолошката градина во Скопје. Илиевски, како што посочуваат од ДКСК, бил назначен на директорската позиција, иако не го исполнувал условот за истото, односно претходно не бил вработен во самиот објект.
Неправилноста, како што информираат од Антикорупциска, била утврдена при вонреден инспекциски надзор, по што инспекторот укажал за нејзино отстранување во предвидениот законски рок, со напомена дека за сторената повреда на членот 34 од Законот за култура не е определена, ниту пропишана прекршочна санкција.