Со одлуката се врши зголемување на малопродажните цени на нафтените деривати во просек за 2,11 отсто
По вчерашното поскапување на горивата, Регулаторната комисија за енергетика (РКЕ) денеска одлучи за нови цени на нафтените деривати кои ќе стапат во сила од ноќеска на полноќ.
Според одлуката на Регулаторна, од полноќ цената на бензинот еуросупер БС-95 се зголемува за три денари по литар. Еуросупер БС-98, еуродизел (Д-Е V) и екстра лесното масло за домаќинство поскапуваат за 2,5 денари за литар.
Со тоа, новата малопродажна цена на еуросупер БС – 95 ќе изнесува 107 денари, еуросупер БС – 98 ќе се продава за 109 денари, еуродизел БС (Д-Е V) за 97,5 денари, а екстра лесното масло за горење (ЕЛ-1) за 95,5 денари за литар.
Малопродажната цена на мазутот, пак, денеска не се менува и останува 54,64 денари за килограм.
Како причина за зголемувањето на малопродажни цени на нафтените деривати од РКЕ ги посочуваат зголемените референтни цени на нафтените деривати на светскиот пазар кај бензините во просек за 4,584 отсто и кај дизелот за 4,856 отсто, како и за 0,467 отсто повисокиот курс на доларот во однос на денарот.
Со одлуката, се врши зголемување на малопродажните цени на нафтените деривати во просек за 2,11 отсто.