Ѓорѓиевски нагласи дека овие проекти значително ќе го зголемат протокот на возила и ќе ги елиминираат долгите колони при влезот во Скопје
Кандидатот за градоначалник на Скопје од ВМРО-ДПМНЕ, Орце Ѓорѓиевски, денеска презентираше инфраструктурни проекти наменети за растоварување на сообраќајот во источниот дел на градот, со посебен фокус на Општина Гази Баба. Тој најави изградба на клучката кај Хиподром и трета лента на булеварот „Александар Македонски“.
Ѓорѓиевски нагласи дека овие проекти значително ќе го зголемат протокот на возила и ќе ги елиминираат долгите колони при влезот во Скопје.
„Клучката кај Хиподром ќе обезбеди директно поврзување со улицата ‘Пролетна офанзива’, што е клучно за возачите што доаѓаат од Куманово и Велес. Со третата лента на булеварот ‘Александар Македонски’, од мостот кај Сингелиќ до мостот во Автокоманда, ќе се овозможи значително зголемување на протокот на возила и нивно насочување кон Гази Баба и ќе се растовари целиот источен дел на градот“,
рече Ѓорѓиевски.
Тој најави и старт на изградбата на првата фаза од булеварот „Хрватска“, како дел од внатрешната обиколница на Скопје, која стратешки ќе ги поврзе Гази Баба, Бутел и Чаир.
Пред овој проект, Ѓорѓиевски најави дека ќе започне изградба на нов водоводен крак – инвестиција клучна за подобрување на водоснабдувањето во високите зони на Автокоманда и Железара, како и во селата на Гази Баба.
Ѓорѓиевски најави и нови поврзувања помеѓу Гази Баба и Аеродром, вклучувајќи го поврзувањето на булеварите „Александар Македонски“ и „АСНОМ“ преку мостот „Михаило Апостолски“, како и реконструкција на улицата „Перо Наков“ и нејзино поврзување со булеварот „Февруарски поход“ преку нов мост на Вардар.
Во делот на рекреативните содржини, Ѓорѓиевски најави дека Скопје ќе добие нов, модерен лунапарк до јули 2027 година.
„Имаме проект, ќе ги искористиме и доплатиме постојните шест реквизити и ќе набавиме нови, за да овозможиме ултра совремемен, модерен лунапарк каков што заслужуваат нашите деца“,
рече тој.
Тој и денеска повтори дека негови први приоритети ќе бидат расчистувањето на градот од комунален отпад во првите 72 часа и нормализирање на јавниот превоз, со цел граѓаните да не чекаат на студ.
Во однос на Аквапаркот, кој е во државна сопственост, Ѓорѓиевски изрази очекување дека тој ќе биде ставен во функција од наредната пролет.
Ѓорѓиевски нагласи дека Скопје има преубави места кои што треба само да го добијат вистинскиот сјај, но во неговите први приоритети ќе биде расчистувањето на Градот од комунален отпад и нормализирање на јавниот превоз.