Градоначалникот на Кисела Вода рече дека при контролите се утврдени одредени аномалии кај дел од објектите под надлежност на општините, но кои, како што кажа, не се од големи размери и кои не би можеле да се решат за кратко време
Сите градоначалници до крајот на месецов треба да обезбедат записници за безбедноста на училиштата, градинките, спортските сали и за сите културни установи под нивна надлежност, кои потоа ќе бидат споделени со Владата и јавноста на заеднички координативен состанок, информира вечерва градоначалникот на Општина Кисела Вода, Орце Ѓорѓиевски, кој е и претседател на Заедницата на единиците на локалната самоуправа (ЗЕЛС).
Во врска со контролите во објектите што почнаа по трагедијата во Кочани, во делот на безбедноста, Ѓорѓиевски во вечерашното издадние на емисијата „Топ тема“ на ТВ Телма рече дека дел од општините веќе постапуваат.
„Заклучокот на ЗЕЛС е дека во најголем број случаи, ја земам предвид и мојата општина, со потписи е потврдено од сите стручни лица кои учествувале во процесот дека има целосна документација, противпожарните апарати, хидрантите се на број и сите се исправни. Вакви записници треба да обезбедат сите градоначалници до крајот на овој месец, и за училиштата, и за градинките, и за спортските сали и за сите културни установи кои ги имаат под нивна надлежност и тие да ги споделиме со Владата, на еден заеднички координативен состанок, како и со јавноста“,
рече Ѓорѓиевски.
Градоначалникот на Кисела Вода рече дека при контролите се утврдени одредени аномалии во градинките, но кои, како што кажа, не се од големи размери и кои не би можеле да се решат за кратко време.
Како што кажа, станува збор за објекти кои се градени по различни стандарди, односно едни кои важеле за време на СФРЈ, а други според новите правилници.
„На пример во Општина Центар градинките се градени по стандарди од СФРЈ, каде се препорачувало јаслите да бидат на вториот кат, а по новите правилници јаслите треба да се на првиот кат. Сето тоа се смета како еден од условите кои во моментов треба да ги исполни градинката. Во наредниот период ќе треба градоначалниците да ги адаптираат, односно да интервенираат во оние делови каде не се исполнуваат условите“,
рече тој.
Аномалии, како што кажа, се утврдени и во домовите за стари лица, каде, додаде, ќе треба да се постапува во наредниот период за да направи адаптација за да се исполнат условите.
Ѓорѓиевски посочи дека постојниот систем се базира на дискрециско право на инспекторите, наместо на законски дефинирани рокови за постапување. Тој, наведе оти е потребна законска промена што ќе наложи задолжителни инспекциски контроли, особено за објектите од јавен интерес како градинки, училишта и спортски сали.
„Кај нас она што недостасува, според мене, се промени во законот, во делот дека мора да се постапува во одреден период. Тоа се однесува и на инспекциските служби. Сега е за жал оставено на добрата волја на инспекторот. Кој со кого се познава, и кој колку побрзо може да добие одредена потврда одобрение итн. Многу често се дискутира околу тоа изминатиов период, дали требало да се случи ваква ситуација за да излеземе ние во вондредни контроли, во сите објекти од јавен карактер“,
рече Ѓорѓиевски.
Според него, безбедноста на јавните објекти не смее да зависи од добра волја, туку од системски дефинирани обврски.