За другите кадровски решенија рече дека сè уште нема одлучено, а за враќање на функцијата градски архитект дека зависи од измените во Законот за локална самоуправа
Градоначалникот на Град Скопје, Орце Ѓорѓиевски, вечерва ги соопшти имињата на новите вршители на должноста директори во четири јавни претпријатија.
Новите имиња што ги обелодени Ѓорѓиевски во емисијата „Само интервју“ на Канал 5 се однесуваат на јавните претпријатија „Улици и патишта“, „Водовод и канализација“, Јавното сообраќајно претпријатие „Скопје“ и „Комунална хигиена“.
За в.д. директор на „Улици и патишта“ се враќа Борис Настов, кој ја извршуваше функцијата и на почетокот на мандатот на поранешната градоначалничка Данела Арсовска. Ѓорѓиевски кажа дека Настов сега ја извршува функцијата заменик-директор во Јавното претпријатие за државни патишта и го оцени како „човек што најдобро ја разбира проблематиката“.
Нов в.д. директор во „Водовод и канализација“ ќе биде Иван Митровски, поранешен заменик-градоначалник на Кисела Вода и кадар од банкарскиот сектор.
На чело на „Комунална хигиена“, Ѓорѓиевски кажа дека доаѓа Драги, но не го спомена неговото презиме. Тој кажа дека станува збор за човек со долгогодишно искуство во комуналниот сектор на Град Скопје, кој „исклучително добро се покажа“ за време на неодамнешната акција за чистење за 72 часа. Градоначалникот нагласи дека тој не е партиски експониран.
За в.д. директор на ЈСП „Скопје“, Ѓорѓиевски повторно без да каже целосно име и презиме на кадарот, рече дека е назначен Саше, долгогодишен вработен во претпријатието, кој има искуство и ги разбира процесите.
Тој додаде дека некои од новоназначените лица за својата функција ќе дознаат токму преку телевизија.
„Добри соработници ќе ми бидат“,
рече Ѓорѓиевски.
На новинарско прашање дали во Зоолошката градина ќе биде вратен поранешниот директор Горѓи Галетановски, откако тоа го побара еден од вработените во ЗОО, Ѓорѓиевски рече дека Галетановски е советник во Советот на Град Скопје.
„Ќе дадам сè од себе одлуките во Советот на Град Скопје да ги носиме со поддршка на сите советнички групи. Ќе соработувам и ќе комуницирам со сите. Советниците се избрани од граѓаните, најчесто имаат добри предлози. Галетановски ќе може одлично да помогне со совети, идеи, предлози“,
беше одговорот на Ѓорѓиевски.
За другите кадровски решенија рече дека сè уште нема одлучено, а за враќање на функцијата градски архитект дека зависи од измените во Законот за локална самоуправа.
За тоа дали Мишко Ралев ќе биде дел од неговиот тим, нешто што беше најавувано уште пред почетокот на кампањата, и дали ќе биде вратена функцијата градски архитект, Ѓорѓиевски рече дека тоа треба да се случи со измените за Законот за локална самоуправа.
„Мишко Ралев, Огнен Марина, Горан Мијовски, Славе Трпевски, Аљоша Шопар ми се дел од урбанистичкиот тим“,
рече тој.
Во своето гостување Ѓорѓиевски категорично негираше дека некогаш најавил приватизација на јавните претпријатија. Напротив, најави дека ќе работи на зајакнување на нивните капацитети и постигнување самоодржливост.
„Сметките за граѓаните нема да се поскапат. Така сум ветил во кампањата“,
порача Ѓорѓиевски.