Со ова, како што посочуваат од изборниот штаб на Ѓорѓиевски, Скопје ќе се вброи меѓу европските градови кои се дел од мрежата на еден од најпрестижните музички фестивали во Европа, што ќе значи зголемување на туристичкиот потенцијал на главниот град
Кандидатот за градоначалник на Скопје од редовите на ВМРО-ДПМНЕ, Орце Ѓорѓиевски, најави дека главниот град од следната година ќе биде домаќин на Егзит“ (ЕXIT) – еден од најголемите музички фестивали во Европа. Тој ова го соопшти во објава на својот фејсбук-профил по состанокот со основачот на фестивалот, Душан Ковачевиќ.
„Со огромно задоволство ве информирам дека со основачот на EXIT, г-дин Душан Ковачевиќ, разговаравме од следната година Скопје да биде нова дестинација на една од водечките европски фестивалски групации. Убеден сум дека бренд како EXIT значително ќе го зголеми квалитетот на забавниот живот и културната понуда на Скопје и Македонија, ставајќи го на мапата на топ дестинации за посета на огромен број туристи“,
пишува Ѓорѓиевски во објавата.
Со ова, како што посочуваат од изборниот штаб на Ѓорѓиевски, Скопје ќе се вброи меѓу европските градови кои се дел од мрежата на еден од најпрестижните музички фестивали во Европа, што ќе значи и нова енергија, нови инвестиции и зголемување на туристичкиот потенцијал на главниот град.
Годинашното 25-то јубилејно издание на „Егзит“, кое традиционално се одржа на Петроварадинската тврдина во Нови Сад, е и последното одржано на оваа локација. Организаторите на фестивалот соопштија дека „Егзит“ официјално потпишал договор со египетска компанија и дека следното издание ќе се одржи во Египет.
Причината за смена на местото на одржување на фестивалот е јавната поддршка што „Егзит“ ја даде за масовните студентски протести во Србија кои почнаа по трагичниот пад на натстрешницата на Железничката станица во Нови Сад на 1 ноември лани, кога загинаа 16 лица. Поради тоа, организаторите на фестивалот се соочија со целосен прекин на државното кофинансирање и беа принудени да го сменат местото на одржување на настанот.