Според него, по претходната дебата меѓу него и Мециновиќ, која се одржа во вторникот на ТВ Канал 5, веќе се јасни ставовите и јасна е сликата за двајцата кандидати во трката за Скопје
Кандидатот за градоначалник на Град Скопје од редовите на владејачката ВМРО-ДПМНЕ, Орце Ѓорѓиевски, на својот фејсбук-профил објасни зошто нема да присуствува на најавената дебата со противкандидатот од Левица, Амар Мециновиќ, која беше најавена за вечерва на ТВ Телма. Во објавата тој вели дека вечерва во тој термин се одржува завршниот митинг на неговата кампања во Скопје, на кој ќе присуствува.
Сепак, нагласи и дека целосно ги почитува намерата и професионалноста на телевизијата која ја испратила поканата за дебата.
„Вечерва одбрав да бидам со мојот народ, на завршниот митинг во Скопје. Добро знаете, никогаш не бегам од ништо“,
вели тој.
Според него, по претходната дебата меѓу него и Мециновиќ, која се одржа во вторникот на ТВ Канал 5, веќе се јасни ставовите и јасна е сликата за двајцата кандидати во трката за Скопје.
„Евидентно е ниското ниво на политичка култура, но и присутната безидејност и недостигот на планови кај кандидатот Амар Мециновиќ, што значи дека секоја следна дебата не би била натпревар и судир на концепти, туку судир меѓу концепт за Скопје, претставуван од мене и од ВМРО-ДПМНЕ и демагогија, празна реторика и отсуство на план кои се карактеристики на Амар Мециновиќ. На Скопје му требаат решенија, а не демагогија“,
пишува Ѓорѓиевски на Фејсбук.
Порача и дека часови по локална самоуправа ќе држи од понеделник, по победата во вториот круг.
Кандидатите за градоначалник на Град Скопје од редовите на ВМРО-ДПМНЕ и Левица, Орце Ѓорѓиевски и Амар Мециновиќ, во дебата на ТВ Канал 5 во вторникот ја коментираа состојбата со нечистотијата во градот.
Ѓорѓиевски нагласи дека ветувањето за чисто Скопје во рок од 72 часа е реално и остварливо.
Мециновиќ, пак, упати серија критики за актуелното управување со градот и за, како што рече, „кампањското чистење“ на Скопје.