„Жителите на Кисела Вода ќе имаат брз и лесен пристап до лекари и специјалистички услуги, без потреба да патуваат во други делови на градот, а истовремено таа ќе придонесе за растоварување на постојните здравствени установи во Скопје“, вели актуелниот градоначалникот на Општина Кисела Вода во заминување, Орце Ѓоргиевски, кој е кандидат на ВМРО-ДПМНЕ за градоначалник на Скопје
Парите за изградба на поликлиниката се обезбедени преку унгарскиот кредит, а таа ќе биде изградена по примерот на здравствените установи во Бутел, Илинден и Зеленково, изјави заменик-министерот за здравство Јовица Андовски кој присуствуваше на прес-конференцијата во Кисела Вода
Поликлиника што ќе се протега на површина од 1 780 квадратни метри и во која ќе бидат сместени сите неопходни служби за современа здравствена заштита е проектот што треба да никне во населбата Расадник во Општина Кисела Вода.
Него денеска го промовираше актуелниот градоначалникот на општината во заминување, Орце Ѓоргиевски, кој е кандидат на ВМРО-ДПМНЕ за градоначалник на Скопје, заедно со кандидатката на партијата за градоначалник на Општината, Бети Стаменкоска-Трајкоска.
Поликлиниката, според проектот, ќе има подрум, приземје и кат. На приземјето ќе бидат сместени лабораторија, стоматолошка ординација, детски оддел, итна и дежурна служба, ортопедија и матични лекари, а на катот интерна медицина, кожно, гинекологија и ординација за уво, нос и грло, заедно со административни простории.
Според Ѓорѓиевски, изградбата на поликлиниката во Расадник ќе значи унапредување на здравствената заштита и на подобрување на квалитетот на живот на жителите на овој дел од главниот град.
„Жителите на Кисела Вода ќе имаат брз и лесен пристап до лекари и специјалистички услуги, без потреба да патуваат во други делови на градот, а истовремено таа ќе придонесе за растоварување на постојните здравствени установи во Скопје“,
рече Ѓорѓиевски.
Изградбата на поликлиниката, како што додаде тој, е барање на жителите на Кисела Вода кои со децении се соочувале со недостигот на една ваква здравствена установа.
Кандидатот на ВМРО-ДПМНЕ за градоначалник на Скопје рече дека за разлика од изминатите триесет години, во кои оваа тема била само празно ветување, денес овој проект е во фаза да стане реалност.
Тој наведе дека во делот кај Расадникот, кој беше спорен во однос на изградбата на станбени згради, ќе има друга намена.
„Од 99 згради, за 70 проценти во идејното решение е намалена површината на градба. Максималната висина што се предвидува е до седум ката, но јас искрено сметам дека овде не е приоритетно да се градат згради, туку поликлиника и за тоа постои постоечки стар детален урбанистички план. Згради овде не се приоритет и тоа и го порачувам и на идната градоначалничка и мислам дека за тоа ќе добие силна поддршка од граѓаните“,
изјави Ѓорѓиевски.
Парите за изградба на поликлиниката се обезбедени преку унгарскиот кредит, а таа ќе биде изградена по примерот на здравствените установи во Бутел, Илинден и Зеленково, изјави заменик-министерот за здравство Јовица Андовски кој присуствуваше на прес-конференцијата во Кисела Вода.
Одговарајќи на новинарско прашање, надвор од темата, кандидатот за градоначалник на Град Скопје од редовите на ВМРО-ДПМНЕ го повтори своето предизборно ветување дека доколку ја добие довербата на граѓаните и стане градоначалник за 72 часа ќе го реши проблемот со комуналниот отпад во Скопје.
Рече дека во чистењето на градот ќе помогнат градските служби, општествено одговорни компании, а ќе бидат вклучени и граѓаните затоа што во изминатиот период добил голем број понуди да се приклучат во чистењето на градот.
Тој посочи дека во изминатиот период во општина Кисела Вода, каде се уште е актуелен градоначалник, се отстрануваат контејнерите од нивните локации и се остава по еден контејнер со цел да му се нанесе штета.
„Во изминатиот период свесно и намерно се вадат контејнерите од микролокациите со цел да се создаваат диви депонии околу контејнерите. На позициите каде имало по три до четири контејнери, сега е оставен само еден, сметајќи некој дека со тоа ќе ми предизвика штета. Сметам дека таа што го води градот уште десетина дена го потценува сопствениот народ, а скопјани добро знаат кој се грижи за нив и работи за нив, а кој со вакви смешни интриги се служи во изминатите четири години“,
рече Ѓорѓиевски.