Нема промена во реториката и пристапот на бугарската страна и сѐ додека е така не може да очекуваме напредок во работата на заедничката комисија, вели за „Слободен печат“ Драги Ѓоргиев, копретседавач од македонска страна на Мешовитата комисија за историски и образовни прашања, запрашан да ги коментира последните изјави на бугарскиот копретседавач Ангел Димитров дека во Комисијата нема напредок „поради неподготвеноста на колегите да прифатат дека имаме заедничка историја која почнала во средниот век“.
„Колку ќе се овозможи приближување на ставовите зависи и од двете страни, но со ваквите изјави другата страна однапред одредува во која насока ќе одат состаноците. Нема промена во реториката и во пристапот на бугарската страна и сѐ додека е тоа така, не очекуваме дека ќе има придвижување. Кога едната страна ја обвинува другата страна дека не сака да ја прифати апсолутната вистина на првата страна, не може да се очекува напредок во процесот. Бугарската страна инсистира на заедничка историја, воспоставена во средниот век. Ние не бегаме од заедничката историја, но, тоа не треба да се сфаќа на начин како тоа го сфаќа бугарската страна – дека историјата од средниот век до 1945 година е заедничка. Ако е така, тогаш тоа воопшто не е заедничка историја, туку е историја на еден ист народ“,
вели Ѓоргиев за „Слободен печат“.
Ангел Димитров во изјавата за БНТ најави и дека како одговор на новата енергија во билатералните односи се планира поголема динамика и во нивната работа. До средината на мај треба да има три состаноци, но тој ги обвини колегите од македонска страна за блокирањето на работата.
„Имаме искуство, знаеме што да очекуваме и пристапуваме со внимание и реализам, без посебни очекувања. Ние сме во средниот век, уште сме на материјата што се учи во основно училиште, сè уште не сме стигнале до она што се учи во средно, а работиме три и пол години. Сето тоа е поради неподготвеноста на нашите колеги да прифатат дека имаме заедничка историја, а таа започнува во средниот век. На тоа се должи блокирањето на нормалниот ритам на работа на Комисијата“,
посочи Димитров.