Не се знае кога ќе бидат поправени инструментите во државните мерни станици кои сѐ уште не ги мерат сите штетни честички во воздухот.
На новинарско прашање зошто не се поправени иако беше најавено дека ќе бидат ставени во функција до крајот на годината, министерот за животна средина Насер Нуредини на денешната прес-конференција рече дека мерните инструменти се купени и се чека испорака.
„За жал, се наоѓаме во таа состојба во која сме, доцнењето е поради процедурите. Ние од нашиот буџет ги купивме потребните мерни инструменти, а истовремено имаме соработка и со Владата на Шведска која нѐ поддржува во ваквата програма. Информирани сме од соодветните институции дека во краток рок ќе стигнат мерните инструменти“,
рече Нуредини.
На прашањето дали ќе се намали аерозагадувањето во 2021 година со буџет од 16 милиони евра, Нуредини рече дека секогаш бараат повеќе буџет, но истовремено соработуваат со другите министерства кои имаат свој буџет за намалување на загадувањето.
„Ние како министерство секогаш бараме повеќе буџет и продолжуваме да бараме повеќе средства за инвестирање во животната средина. Но, доколку го видите подобро Буџетот на државата, ќе видите дека не само Министерството за животна средина и просторно планирање, туку и другите министерства и институции во државата имаат буџет за инвестиции во животната средина. На пример, Министерството за транспорт и врски има буџет за гасификација, што ќе помогне за намалување на загадување на воздухот во државата, Министерството за економија има програма за субвенционирање за греењето на домаќинствата, Министерството за финансии има средства за инвестирање во ефикасна енергија. Ние ние сме во соработка и координација со сите државни институции со цел да се намали загадувањето на воздухот и да се грижиме за нашата животна средина“,
рече Нуредини
Прашан за тоа кога ќе биде акредитирана централна лабораторија, која ќе ги контролира загадувањата од разни извори, Нуредини рече дека е направена апликацијата која централната лабораторија на Министерството за животна средина и просторно планирање треба да ја достави до Институтот за акредитација. Процедурата, како што вели, доцни поради ковид-пандемијата.
„Се надеваме дека централната лабораторијата на Министерството за животна средина и просторно планирање ќе се акредитира. Ние сме во исклучително вонредна состојба поради пандемијата. Голем број од работниците се изолирани и болни и имаме доцнење во процесите. Институтот за акредитација ќе ја акредитира централната лабораторијата на Министерството и ние сме во соработка со нив“,
додаде Нуредини.
Нуредини рече дека се оди чекор по чекор во справувањето со аерозагадувањето. Рече дека се работи на гасификацијата и дека в година ќе се работи и на секундарната и терцијарната мрежа.