Семејното насилство, велат од Обвинителството, го вршел иако имал активно изречени судски мерки со кои му било забрането физички и психички да ги малтретира сопругата и двете малолетни деца
Охридското Основно јавно обвинителство повело постапка и бара притвор против 45-годишен жител на градот, кој и покрај судските мерки подолг период физички и психички ги малтретирал својата сопруга и двете малолетни деца.
Како што информираа денеска од Јавното обвинителство на Република Северна Македонија, осомничениот се товари за три кривични дела – телесна повреда (од член 130 став 2 во врска со став 1), загрозување на сигурноста (од член 144 став 3 во врска со став 1) и неизвршување судска одлука (од член 377 став 5) од Кривичниот законик (КЗ).
Во соопштението од Обвинителството споделуваат детали од настан што се случил пред два дена, односно на 24 март, кога осомничениот во семејниот дом во Охрид физички го нападнал и телесно го повредил својот 10-годишен син.
„Детето го удирал со тупаници, шлаканици и клоци по целото тело, а во еден момент го фатил за коса и така го подигнал од подот“,
велат од Обвинителството.
Како што наведуваат оттаму, осомничениот во континуитет подолг период се заканувал по животот на неговата сопруга, со што ја загрозил нејзината сигурност.
Семејното насилство, велат од Обвинителството, го вршел иако имал активно изречени судски мерки со кои му било забрането физички и психички да ги малтретира сопругата и двете малолетни деца.
Поради непочитувањето на судските забрани, како и поради очигледната намера да се однесува насилнички кон своето семејство, но и ризикот од бегство, надлежниот јавен обвинител доставил предлог до Судот на осомничениот да му биде одредена мерка притвор.