Во честитката на американскиот државен секретар Марко Рубио се додава дека САД остануваат посветени на продлабочување на меѓусебната соработка
Амбасадата на Соединетите Американски Држави во Скопје преку објава на социјалните мрежи го честита 8 Септември – Денот на независноста на државата. Оваа година, како што се вели во објавата, е особено значајна бидејќи се одбележува и 30-годишнина од воспоставувањето дипломатски односи меѓу двете земји.
„Во текот на три децении, изградивме силно партнерство – работејќи заедно во дипломатијата, безбедноста, образованието, културата и друго“,
се наведува во честитката од Амбасадата на САД.
Во прилог на објавата е споделена и честитката што по повод 34-годишнината од независноста на Македонија ја испратил и американскиот државен секретар Марко Рубио во која наведува дека САД остануваат посветени на продлабочување на меѓусебната соработка за зајакнување на колективната безбедност, борбата против транснационалните закани и промовирање на просперитетот.
„Соединетите Американски Држави го ценат цврстото партнерство на Северна Македонија во унапредувањето на глобалната безбедност и стабилност. Како сојузник на НАТО посветен на одбраната на мирот и слободата, вашето ветување за зголемени трошоци за одбрана на самитот на НАТО ова лето, ја нагласува посветеноста на Северна Македонија на нашите заеднички безбедносни цели“,
пишува Рубио во честитката.
Претседателката на државата Гордана Сиљановска-Давкова во петокот прими писмена честитка од американскиот претседател Доналд Трамп по повод Денот на независноста. Честитката ѝ ја врачи амбасадорката Анџела Агелер за време на средбата во претседателската „Вила Билјана“ во Охрид.