„Се сомневав дека е малтретирана, но не ми признаваше, велеше – ќе биде во ред, мама. А јас во ниту еден момент не го прашав зет ми што, како, сметајќи дека тоа самите ќе си го решат. Дознав и од Катја. Велеше, ќе ти кажам само не кажувај ѝ на мама. Велеше, мама ќе клекне доле, а тато ја шутираше и ја удираше. Дури мојата Катја мала, шестгодишна, ги користеше зборовите к**во, ку***ште, дрољо. Кога ја прашував зошто ги користи тие зборови, велеше дека така татко ѝ ја викал мајка ѝ”, сведочи Љубица Стојановска, мајката на Ивана
Се сомневав дека Ивана е физички малтретирана од зет ми, но не сакаше да ми признае. Ова, меѓу другото, го кажа мајката на Ивана, Љубица Стојановска, во своето сведочење на денешното рочиште од судскиот процес против Стојанче Јовановски.
Стојановска одговараше на прашања на обвинителката Адела Бојчевиќ за околности од врската и бракот на нејзината ќерка со Јовановски. Рече дека на почетокот кога стапиле во брак, во 2019 година, сè изгледало во ред, живееле под кирија и биле среќни.
Ивана работела во приватна фирма и решиле да купат свој стан. Кредитот и сметките до последен момент ги отплаќала Ивана, која на 2 март годинава беше пронајдена мртва по пад од балкон од станот.
Ивана велела дека против Стојанче имало обвинение, дека имал тешко детство, но оти се ќе биде во ред.
Одговарајќи на прашање, Стојановска раскажа дека во 2021 година, една ноќ во 1 часот по полноќ Стојанче ѝ се јавил и ѝ рекол дојде по ќерка ѝ (Ивана), и да си ја носи.
„Тогаш ја нарече со збор кој јас морав да и го кажам на обвинителката. Ја нарече к**ва“,
рече Стојановска, која сведочеше како оштетена.
Кога отишла во станот на ќерката и зетот, ситуацијата била тензична. Во еден момент тој почнал да удира Ивана, со обвинувања дека ја изневерува. Била повикана и полиција.
„Ивана беше исплашена, викаше нека земе и стан и сè, само ќерката да ми ја остави. Кога полицијата го заврши разговорот со него и со нас, рече, ајде смирете се, ќе биде сè во ред. Си отидоа они. И покрај сета таа ситуација зет ми ми се понуди да ме однесе. Јас реков не, сама ќе се вратам“,
рече Стојановска.
На прашање на обвинителката таа рече оти Ивана се плашела маж ѝ да не ѝ ја земе ќерката Катја.
„Таа работеше во приватни фирми, а благодарение на мене, зет ми го вработија во Пожарна. На мојата ќерка секогаш на прво место ѝ беше Катја. Кога го земаа, станот гласаше на нејзино име, таа го плаќаше кредитот, а по некое време имаше барање да биде пола-пола. На негово барање станот се напиша пола-пола. До последниот момент Ивана ги плаќаше сметките, кредитот, телефоните, дури до последен момент ги плаќаше сметките”,
рече мајката на сега покојната Ивана.
Рече дека кај ќерка си забележувала модринки, но таа секогаш велела оти се удрила.
„Кога доаѓаше, секогаш беше под стрес, постојано беше под контрола, одговараше на мобилен телефон каде е, дека е кај нас, нејзините родители”,
рече мајката.
Кажа дека кај Ивана забележувала модринки на рацете и нозете, а на двапати ѝ било модро окото.
„Се сомневав дека е малтретирана, но не ми признаваше, велеше – ќе биде во ред, мама. А јас во ниту еден момент не го прашав зет ми што, како, сметајќи дека тоа самите ќе си го решат. Дознав и од Катја. Велеше, ќе ти кажам само не кажувај ѝ на мама. Велеше, мама ќе клекне доле, а тато ја шутираше и ја удираше. Дури мојата Катја мала, шестгодишна, ги користеше зборовоте к**во, ку***ште, дрољо. Кога ја прашував зошто ги користи тие зборови, велеше дека така татко ѝ ја викал мајка ѝ“,
раскажуваше Стојановска.
Раскажа и за настан од пред Нова година, кога подготвила слатки за внуката и салатата што ја сакала Ивана. Кај неа била и внуката Катја.
„Зедов такси и ја однесов кај нив пред зграда. Дојдов пред зграда, ќерка ми ме чекаше и таксистот помагаше да излеземе. Ќерка ми се тресеше. Викаше – мамо, бегај, се плашеше за мене и рече мамо, бегај, ќе дојде Стојанче, да не ти направи нешто. Набрзина ѝ ги дадов работите и одејќи кон автобуската пеш, слушнав глас од зет ми, едно хистерично викање. Си помислив да останам, но реков да не правам проблем. Некои закани беа, од страв почнав да бегам. Се плашев за моето дете да му направи нешто. Потоа таа ми кажа дека сите тие работи, салатата и благите работи ги фрлил во контејнер. Се сокрив зад автобуската станица. Навистина бев преплашена“,
рече Стојановска.
Таа раскажа и за настан од август годинава, кога Ивана ја снемало од дома.
За случајот добила повик од мајката на Мартин Саздов, која рекла дека Ивана исчезнала откако Стојанче ја нападнал.
Пријавила во полиција, а по извесно време од ПС Карпош ѝ јавиле дека исконтактирале со Ивана и оти таа е во станицата. Кога стигнала, видела дека ќерка ѝ има модринки на рацете и модар врат бидејќи Стојанче се обидел да ја дави.
Полицијата направила записник кој Ивана требало да го потпише следниот ден. Но, не отишла.
„Рече ќе биде во ред, ќе се среди“,
кажа мајката.