Покрај евроамбасадорот, пред присутните гости се обратија и заменик-амбасадорот на Соединетите Американски Држави (САД) во земјава, Ерик Мајер, претставниците на Владата, вицепремиерот за европски прашања Бојан Маричиќ и првиот вицепремиер Артан Груби, како и потпретседателот на Сојузот на борците на Народноослободителната и антифашистичка војна на Македонија (НОАВМ), Наум Буревски
Патот е отворен, а задачите се јасни. Денот на Европа е поглед кон иднината, обновување на обврската за тоа каква Европска Унија сакаме, Европа на вредности и иновации, Европа која ги вклучува младите луѓе, која е конкурентна и отпорна. Северна Македонија е на добар пат да биде дел од оваа визија со членство во ЕУ, откако ги отвори пристапните преговори минатиот јули, истакна евроамбасадорот Дејвид Гир по повод одбележувањето на 9 Мај – Денот на победата над фашизмот и Денот на Европа.
Гир своите пораки ги упати од централната свеченост по повод одбележувањето на 9 Мај која се одржа пред споменикот „Ослободители на Скопје“ во кругот на заградата на Владата на Република Северна Македонија.
Покрај евроамбасадорот, пред присутните гости се обратија и заменик-амбасадорот на Соединетите Американски Држави (САД) во земјава, Ерик Мајер, претставниците на Владата, вицепремиерот за европски прашања Бојан Маричиќ и првиот вицепремиер Артан Груби, како и потпретседателот на Сојузот на борците на Народноослободителната и антифашистичка војна на Македонија (НОАВМ), Наум Буревски.
Евроамабсадорот Гир во своето обраќање рече оти е убеден дека со визија, обединетост и истрајност С Македонија ќе може да си го заземе своето место на земја членка на ЕУ.
„Ние сакаме да сте дел од нас, нашата визија е иднина заедно“,
порача Гир.
Улогата на ЕУ, рече тој, е уште поважна додека се одвива војната на Русија против Украина. Унијата и нејзините истомисленици, како што посочи евроамбасадорот, одговорија на агресијата со неверојатна решителност и единство. Во овој контекст, тој рече дека С Македонија покажала неверојатно водство и лидерство со поддршката за Украина.
„Северна Македонија покажа неверојатно водство и неверојатно лидерство со поддршката што ја даваше за Украина и сакаме да ја поздравиме за тоа додека истовремено ја поздравуваме и храброста на украинскиот народ и оддаваме почит на мажите и жените кои се жртвуваа во Втората светска војна за да го победат фашизмот“,
рече Гир.
Американскиот заменик-амбасадор Ерик Мајер, исто така, се осврна на руската агресија врз Украина, потенцирајќи дека такво безумно непочитување на човечките животи не може да биде оправдано со ништо.
„Да се каже дека дел од она што Русија денес го прави во Украина е некако поврзано со поразување на фашизмот е лага. Тоа е огромно искривување на историјата и е срам, непочитување на луѓето на кои денес им оддаваме почит. За жал, руското лидерство одлучи да оди по овој погрешен, незаконски деструктивен пат, а Европа ќе продолжи да биде сигурна во својата одбрана на територијалниот интегритет на Украина и нејзиното право да одлучува за својата иднина во заедница на мирољубиви нации“,
рече Мајер.
Одлучноста на оние кои се бореа и на крај го поразија фашизмот пред 78 години беше, рече амбасадорот, катализаторот што создаде стабилна, европска заедница, цврста НАТО алијанса и безбедност за стотици милиони луѓе, меѓу кои и луѓето во С Македонија.
Затоа, додаде тој, денес им оддаваме почит и мора да продолжиме да ја почитуваме нивната оставштина со тоа што ќе одбиваме да потклекнеме кога ќе се соочиме со закани по демократските начела и самоопределување.
Вицепремиерот за европски прашања Бојан Маричиќ, во своето обраќање по повод свеченото одбележување на Денот на победата над фашизмот и Денот на Европа упати порака за обединување околу вистинските европски вредности како единствен предуслов за иднината.
На такво нешто, рече Маричиќ, нè обврзува делото на борците кои застанаа против фашизмот за време на Втората светска војна.
„Гордо се сеќаваме и оддаваме почит на борците кои ги бранеа своите држави и светот од најголемото зло на минатиот век, фашизмот. Нивното дело нè обврза да останеме на страна на европските и вистинските вредности, негувајќи ги слободата, толеранцијата, демократијата и дијалогот како светост. Тоа нè држи во блиски односи со нашите европски партнери, стратешки сојузници со кои заедно потврдуваме дека европскиот пат на Северна Македонија е најдобриот начин за зачувување на оние вредности кои нè ставале на страната на правдата и победата“,
рече Маричиќ во своето обраќање.
Не случајно, посочи тој, Денот на Европа го чествуваме заедно со Денот на победата како успешен проект на долгорочен мир меѓу земјите во Европа.
„Денес после повеќе од седум децении ни е потребно солидарност и храброст да си подадеме рака за теми и прашања кои им значат на граѓаните како што се мирот, стабилноста, демократијата, социјалниот и економскиот развој. Имаме добра основа и право да продолжиме понатаму со надминување на предизвиците во овој процес да дадеме шанса, фокусот и визијата да бидеме членка до 2030 да биде реалност. Наша должност е да ја реализираме идејата на нашите предци и да ја пренесеме на нашите потомци, да создаваме, да напредуваме, да прифаќаме европски стандарди и да ги живееме европските вредности. Европа припаѓа на нашиот регион и нашиот регион припаѓа во Европа“,
порача Маричиќ.
Првиот вицепремиер и министер за политички систем и односи меѓу заедниците Артан Груби рече дека пред нас имаме можност да покажеме храброст и лидерство да се обединиме околу членството на земјава во ЕУ.
„Нашата Влада има лидери кои се подготвени да зборуваат за помирување и сето тоа во корист на иднината на нашата земја. Сите да се обединиме, да се помириме и да работиме за иднината на нашата земја“,
рече Груби.
Потпретседателот на Сојузот на борците од НОАВМ (1941-1945) Наум Буревски испрати порака да го сочуваме мирот и да развиваме заедништво, како и еднакво да се бориме против подмолните апетити на денешната светска глобална политика.
„Вековниот сон на борците се исполни, направија сопствена држава, а ние без разлика на партиска, национална, верска припадност да го сочуваме мирот и да развиваме заедништво, еднакво да се бориме против подмолните апетити на денешната светска глобална политика. Затоа што ова е единствена наша матична држава. Опција на Сојузот на борци е што поскоро влегување во ЕУ, т.е. Европа без граници. Да живее Република Северна Македонија! Смрт на фашизмот!“,
порача Буревски.