Белгиското министерство за одбрана одби да ги коментира наводите на Писториус, но оттаму додаваат дека „таа можност веќе била разгледана во Белгија“
Германскиот министер за одбрана Борис Писториус денеска излезе со изјава во која сугерира дека постои поврзаност помеѓу неодамнешните инциденти со беспилотни летала во Белгија и дискусиите за користење на замрзнатите руски средства, што ги чува белгиската финансиска институција „Еуроклир“, за финансирање на големиот заем Украина, пренесе Ројтерс.
Појавата на беспилотни летала над аеродромите и воените бази стана проблем во Белгија во изминатите денови и предизвика нарушувања на воздушниот сообраќај. Идентични случаи во последните месеци беа рагистрирани и на аеродромите и во други европски држави.
Дел до официјалните претставници на овие земји за иницидентите ја обвинија Русија, наведувајќи дека тие се дел од „хибридната војна“ што Москва ја води против европските сојузници на Украина.
Од друга страна, Москва постојано негира било каква поврзаност со инцидентите.
„Да, сите го гледаме ова. Белгијците исто така. Оваа мерка е насочена кон ширење несигурност и заплашување во Белгија: Не се осмелувајте да ги допирате замрзнатите средства. Ова не може да се толкува на друг начин“,
изјави Писториус на прес-конференција во Берлин.
Белгиското министерство за одбрана одби да ги коментира наводите на Писториус, но оттаму додаваат дека „таа можност веќе била разгледана во Белгија“.
Белгискиот премиер Барт де Вевер изјави дека неговата земја ѝ се потребни конкретни и цврсти гаранции пред да може да се спроведе планот за користење на замрзнатите руски средства за да ѝ се помогне на Украина во борбата против руската агресија.
Инаку, ставот на Белгија околу ова прашање е клучен, бидејќи тамошната финансиска институција „Еуроклир“ (Euroclear), ги поседува средствата што европските сојузници имаат намера да ги искористат за помош на Киев.
Во меѓувреме, аеродромот во белгискиот град Лиеж ги продолжи летовите откако тие привремено беа запрени денеска поради забележан дрон, што е втор ваков инцидент оваа недела.
Претходно во вторникот, беспилотни летала што беа забележани над аеродромите во главниот град Брисел и во Лиеж, на истокот на земјата, предизвикаа пренасочување на голем број дојдовни летови и приземјување на некои од авионите што требаше да полетаат.
Поради инцидентите, белгиската влада вчера свика итен состанок на советот за безбедност на земјата на кој се дискутираше за справување со проблемот што министерот за одбрана го нарече координиран напад.
Забележани беспилотни летала, вчера беа причина и за привремено затворање на аердромите во уште неколку европски земји, меѓу кои и во Шведска.
Германската војска почна со формирање тимови за брз одговор, како дел од мерките за справување со заканите со беспилотни летала, изјави висок германски воен функционер.
„Овие единици против беспилотни летала се формираат токму сега“,
вели во интервју за Ројтерс генерал-полковник Александар Солфранк, кој раководи со германската Здружена оперативна команда и го надгледува одбранбеното планирање на земјата.
Германското министерство за одбрана вчера соопшти дека испраќа експерти за борба против дронови во Белгија на барање на Брисел.
Солфранк во интервјуто одбил да соопшти детали во врска со новите единици за борба против дронови, поради оперативна безбедност, но навел дека тимот што бил испратен во Копенхаген минатиот месец на Самитот на Европската Унија имал опрема која вклучувала сензори и ефекори.
„Тие имаа различни системи за откривање и справување со дронови. Имаме опција, на пример, да преземеме контрола врз дрон и да го слетаме на одредена локација“,
вели тој.
Тој додал, дека експретите за справување со беспилотни летала имаат свои дронови кои можат да исфрлаат мрежи за да фатат други летала и на тој начин да ги соборат.