Работата на преговарачката рамка ќе биде приоритет во досието за проширување и за време на германското претседателство, но значајно е Владата на Северна Македонија да продолжи со реформите, вели Томас Герберих во интервју за МИА
Постигнувањето согласност во Европскиот совет за започнување на пристапни преговори со Албанија и со Северна Македонија требаше да се случи одамна. Тоа е во интерес на ЕУ како целина, но особено во интерес на соседните држави на ЕУ во регионот. Би било сега грешка овој успех да се уништи со политизација на историските дадености. За историските прашања мора да се разговара, може и контроверзно да се дискутира за нив. Но, тие не им припаѓаат на политичките процеси кои ги решаваат проблемите на сегашноста и мора одговорно да се насочени кон иднината.
Ова го вели, во интервју за МИА, германскиот амбасадор Томас Герберих во врска со стравувањата дека бугарските барања во делот на историјата и јазикот се вовед во ново вето за Скопје во процесот на евроинтеграцијата.
Запрашан за коментар дали процесот на проширување може да забави поради корона-пандемијата, амбасадорот Герберих подвлекува дека станува збор за глобален предизвик со кој сите мора актуелно да се соочиме и тоа е моментално приоритет и за ЕУ и за нејзините партнери, но Западен Балкан, вели, останува високо на дневниот ред на ЕУ.
„Северна Македонија, како и сите земји од Западен Балкан, презеде брзи и решителни мерки и успеа да ја намали стапката на инфекција и да ја држи смртноста на ниско ниво. Исто како во Германија, политиката и општеството сега почнуваат да размислуваат за стратегии за излез и за опоравување. Се разбира дека ова моментално е приоритет и за целата ЕУ и за нејзините партнери. Но Западен Балкан е сосема горе на дневниот ред на ЕУ. Ова не се празни зборови, туку реалност. Обемната поддршка на ЕУ за земјите од Западен Балкан за справување со короната е значаен доказ за тоа“,
истакнуваГерберих.
Усогласувањето на преговарачката рамка за Северна Македонија очекува да почне во јуни, но вели, не е предвидливо кога таа ќе биде финализирана, бидејќи новата методологија а проширување мора да се заокружи, а корона-кризата ги успорува и тековите во Брисел.
„Работата на преговарачката рамка ќе биде приоритет во досието за проширување и за време на германското претседателство со Советот. Значајно е Владата на Северна Македонија да продолжи со реформите“,
вели германскиот дипломат.