„Овие 35 илјади гости практично ќе бидат на балканска тура. Таа започнува со едно ноќевање во Скопје, потоа продолжува во Црна Гора, па Албанија. Потоа повторно се враќаат кај нас во Охрид, каде што ќе имаат едно ноќевање, и завршува со уште две ноќевања во Скопје. Тоа значи дека овие туристи ќе имаат четири ноќевања во Македонија“, рече премиерот
Од февруари следната година по еден авион со туристи од Германија, Франција и од Велика Британија секој ден ќе пристигнува во земјава. Значи, околу 35 илјади туристи годишно надвор од сезоната ќе ја посетуваат Македонија и нејзините културни знаменитости. Ова денеска на прес-конференција во Владата го најави премиерот Христијан Мицкоски заедно со претставникот од туристичката агенција РСД од Германија и посочи дека на овој начин ќе имаме можност да ги покажеме нашите културни капацитети, како што се Градот Охрид, Скопје, Меморијалниот центар „Мајка Тереза“ и другите знаменитости што не карактеризираат како држава.
„Самата агенција РСД има повеќе од една милијарда евра годишен обрт. Покрај туризмот се занимава и со други области, како маркетинг, телекомуникации, енергетика, хотелиерство. Значи, претставува многу сложена групација“,
рече премиерот.
Според искуствата од германската агенција, како што рече Мицкоски, туристичките посети би донеле дополнителни 30 милиони директни трошења кај нас од страна на овие гости, а ако се вклучат и трошоците за сместување и превоз, може да се дојде до бројката од 50 милиони евра.
„Овие 35 илјади гости практично ќе бидат на балканска тура. Таа започнува со едно ноќевање во Скопје, потоа продолжува во Црна Гора, па Албанија. Потоа повторно се враќаат кај нас во Охрид, каде ќе имаат едно ноќевање, и завршува со уште две ноќевања во Скопје. Тоа значи дека овие туристи ќе имаат четири ноќевања во Македонија“,
вели тој.
Вкупниот број ноќевања што ќе го имаат овие 35 илјади туристи претставува 10 до 15 отсто од вкупниот број ноќевања што сега ги остваруваат странските гости кај нас.
Мицкоски најави дека во план е оваа бројка да ја дуплираат, па дури и да ја триплираат.
„Дали во иднина ќе имаме два или три чартер летови дневно зависи од нас бидејќи гостите имаат и свои побарувања во делот на квалитетот на сместувачките капацитети. Треба и ние како држава да поддржиме таков тип на сместувачки капацитети што ќе бидат атрактивни за овој тип на гости“,
рече Мицкоски.