„Русија повторно планира зимска војна за да ги направи животите на Украинците што е можно понеподносливи“, изјави шефицата на германската дипломатија, Аналена Бербок, пред денешниот министерски состанок во Кишињев, Молдавија
Германија најави дека претстојнава зима ќе обезбеди дополнителни 100 милиони евра помош за Украина. Најавата дојде од германската министерка за надворешни работи Аналена Бербок за време на нејзината посета на Молдавија, пренесува регионалниот сервис на Радио Слободна Европа (РСЕ).
„Русија повторно планира зимска војна за да ги направи животите на Украинците што е можно понеподносливи“,
рече Бербок пред министерскиот состанок во Кишињев денеска.
Серијата напади што Москва ги започна на украинската енергетска инфраструктура предизвикаа долги прекини на струја во некои делови од земјата.
Киев во јуни соопшти дека има потреба од повеќе системи за противвоздушна одбрана за да се одбрани од руските напади и да создаде простор за обнова на енергетската инфраструктура и нејзино функционирање во текот на зимата, кога побарувачката е најголема поради ниските температури.
Премиерот на Украина, Денис Шмигал, мината недела ги објави плановите за поправка и заштита на електроенергетскиот систем на земјата пред зимата, кои, меѓу другото, вклучуваат и зајакнување на одбранбените способности против нападите со беспилотни летала и ракети.
Според Шмигал, речиси сите болници и повеќе од 80 отсто од училиштата ширум земјата се опремени со генератори, но сè уште има итна потреба од уште 1 800 генератори со голем капацитет.
Украинскиот претседател Володимир Зеленски во јуни изјави дека руските напади врз енергетските капацитети на Украина уништиле половина од нејзиниот капацитет за производство на електрична енергија од минатата зима.
На почетокот на септември, ЕУ најави 40 милиони евра хуманитарна помош за Украина за поправки, струја, греење и домување пред претстојната зима.