Германија досега евакуираше речиси 3 000 луѓе од 43 земји преку аеродромот во Кабул, меѓу нив и 143 Германци и околу 1 800 Авганистанци
Германија ги разгледува начините за евакуација од Авганистан по истекот на рокот за евакуација од аеродромот во Кабул, соопштија од германското Министерство за надворешни работи.
„Додека дозволува ситуацијата на терен, сакаме да ги оставиме воздушните мостови отворени и да ги евакуираме луѓето од аеродромот во Кабул. Но, ние веќе размислуваме за начини по овој период и наоѓаме решенија за тој период“,
велат од германското министерство за надворешни работи.
Германија досега евакуираше речиси 3 000 луѓе од 43 земји преку аеродромот во Кабул, меѓу нив и 143 Германци и околу 1 800 Авганистанци.
Портпаролот на талибанците за британскиот канал „Скај њуз“ рече дека нема да се согласат на продолжување на евакуацијата од Авганистан, доколку тоа го побараат САД или Велика Британија.
„Тоа е црвената линија. Американскиот претседател Џо Бајден објави дека сите нивни воени сили ќе се повлечат на 31 август. Значи, ако се продолжи рокот, тоа значи дека се продолжува окупацијата, иако тоа не е потребно“,
рече Сухаил Шахин, член на талибанската делегација во Доха.
Британскиот министер за одбрана, Бен Валас, рече дека Обединетото Кралство во вторник, на виртуелен самит на Г7 посветен на Авганистан, има намера да побара од САД да продолжат со операциите за евакуација и по 31 август.