Дополнително, доколку некој ученик со себе носи втор мобилен телефон, треба да му биде одземен и вратен на родителите
Сите основни училишта во Општина Центар се согласиле да ја прифатат препораката на општинските власти со која на учениците им се забранува користење на мобилните телефони во текот на целата настава. Дополнително, доколку некој ученик носи втор мобилен телефон, треба да му биде одземен и вратен на родителите.
За ова, на својот фејсбук-профил денеска информира градоначалникот на Центар, Горан Герасимовски, кој вели дека препораките се во насока на подигање на безбедноста во училиштата со оглед на случувањата од последниот период кои резултирале со повреди на учениците, а се поврзани со социјалните мрежи.
Градоначалникот посочува дека препораките се донесени врз основа на препораките на УНЕСКО, кои во јули 2023 година укажале на негативните ефекти од употребата на паметните телефони врз процесот на учење
„Препораките за забрана на користење на мобилните телефони се прифатени и во образовниот процес во дел од европските земји. Истражувањата на кои се повикува УНЕСКО покажуваат дека мобилните телефони го одвлекуваат вниманието на учениците и имаат особено негативно влијание врз децата кои имаат потешкотии во учењето. Дополнително, децата повеќе разговараат меѓусебно и се дружат, што ја поттикнува социјалната интеракција. Општина Центар ќе продолжи да работи на подобрување на условите за едукација и воспитување на младите, обезбедувајќи балансирано и здраво опкружување за нивниот развој“,
пишува Герасимовски во објавата на Фејсбук.