„Дозволете ми да ја подвлечам важноста од целосната и bona fide имплементација на Преспанскиот договор, вклучително е користењето на уставното име на земјата ерга омнес (за севкупна употреба)“, рече Герапетритис на заедничката прес-конференција со својот македонски колега Тимчо Муцунски во Атина
Шефот на македонската дипломатија, во своето обраќање, пак, рече дека на средбата била истакната важноста на меѓународното јавно право и обврските што двете земји ги имаат преземено и во тој контекст наведе дека меѓусебната почит е основа за градење на трајна соработка и оти длабоко и искрено верува во „нашите односи и во силата на дипломатијата засновани на почит“
Сакам да ја повторам грчката поддршка за Северна Македонија на нејзиниот пат кон Европската Унија базиран на принципот на заслуги, а со особен акцент на фундаменталните вредности, изјави денеска грчкиот министер за надворешни работи Јоргос Герапетритис на заедничката прес-конференција со својот македонски колега Тимчо Муцунски кој е во прва работна посета на Атина по стапување на функцијата министер за надворешни работи и надворешна трговија на Северна Македонија.
Веднаш по изразената поддршка за нашиот евроинтегративен пат, шефот на грчката дипломатија рече дека во таа насока сака да ја истакне важноста на целосната имплементација на Преспанскиот договор.
„Дозволете ми да ја подвлечам важноста од целосната и bona fide имплементација на Преспанскиот договор, вклучително е користењето на уставното име на земјата ерга омнес (за севкупна употреба)“,
рече Герапетритис.
Шефот на македонската дипломатија, во своето обраќање, пак, рече дека на средбата била истакната важноста на меѓународното јавно право и обврските што двете земји ги имаат преземено.
„Меѓусебната почит е основа за градење на трајна соработка. Длабоко и искрено верувам во нашите односи и во силата на дипломатијата засновани на почит“,
рече Муцунски.
На прес-конференцијата, која се одвиваше во пријателска атмосфера, шефовите на дипломатиите се осврнаа на главните теми на разговор.
„Имавме можност да разговараме отворено и да размениме мислења за повеќе прашања од заеднички интерес. Разговаравме за нашите билатерални односи и се договоривме да ги разгледаме патиштата за продлабочување на соработката во иднина. Обединетите преку географијата, нашите држави една покрај друга, покажаа подготвеност да работата заедно во разни ситуации. Грција силно го поддржа пристапувањето на Северна Македонија во НАТО во 2020 година како полноправна членка. Од 2003 година од историската солунска агенда Грција ги вложи своите напори за да ја забрза интеграцијата на земјите од Западен Балкан во Европската Унија. Ќе продолжиме со нашата поддршка на перспективата на регионот, зацврстувањето на на регионалната стабилност и промоција на соработката и просперитетот“,
рече шефот на грчката дипломатија во своето обраќање.
Тој посочи дека Грција и Северна Македонија имаат воспоставено соработка на голем број полиња, вклучувајќи ја економијата, трговијата, инвестициите и проектите за поврзување на транспортните и енергетските мрежи.
„Се договориме да ја зајакнеме нашата билатерална соработка во овие сектори, преку Планот за развој на Европската Унија за Западен Балкан“,
рече Герапетритис.
На средбата, како што кажа тој, станало збор и за геополитичката состојба во светот, за што, според него треба да се посвети особена внимание на зачувувањето на фундаменталните принципи на Повелбата на Обединетите нации.
„Како избрана членка на Советот за безбедност на Обединетите нации Грција соработува со сите земји, вклучително и со Северна Македонија за зачувување на меѓународниот мир и безбедност како цел. Со нетрпение чекам драг колега и пријател да продолжиме да работиме на натамошно продлабочување на нашата соработка, како на билатерално, така и на мултилатерално ниво“,
рече министерот за надворешни работи на Грција.
Шефот на македонската дипломатија средбата со својот грчки колега во Атина ја оцени како многу конструктивна и на која, како што кажа, двајцата реафирмирале нешто фундаментално.
„Дека како соседи и сојузници во НАТО нашата соработка е важна. Важна е за нашите земји, важна е за нашиот регион и важна е за вредностите зад кои стоиме. Благодарен сум за поддршката на Грција на нашиот пат кон Европската Унија и на иднината на земјите од Западен Балкан. Тоа партнерство не е само ценето, туку го гледаме и како витално“,
рече Муцунски.
Тој рече дека на средбата се фокусирале и на економските односи меѓу двете земји и проекти од заеднички интерес, но и на безбедносните прашања, како регионални така и глобални.
„Зборувавме за проекти, како Коридорот 10 и за гасниот интерконектор, не само како технички придобивки, туку како машини за раст, безбедност и регионална поврзаност. Нашата дискусија исто така се фокусираше на безбедноста, и на регионалната и на глобалната. Ја реафирмиравме нашата заедничка посветеност во рамките на НАТО и потребата за блиска координација во овие несигурни времиња. Поддршката за Украина мора да остане. Мора да се направата напори за одвраќање на малигните влијанија и да заложиме за стабилност и за демократските принципи“,
рече Муцунски.
На крајот, министерот за надворешни работи и за надворешна трговија на земјава, рече дека на средбата од сè срце ја изразил својата благодарност за грчката солидарност за време на трагедијата во Кочани и за време на неодамнешниот пожар во близина на Дојран.