Изјавата на претседателот на Судскиот совет доаѓа два дена откако министерот за правда Кренар Лога најави дека власта и опозицијата деновиве ќе разговараат за целосно распуштање на ова тело. Лога ова го најави како едно од можните решенија по загрижувачките настани во Советот во последниот период
Ако се дозволат законски интервенции за Судскиот совет, но и за други тела кои претставуваат уставна категорија, тоа ќе биде лоша порака и лоша пракса за во иднина, вели претседателот на Судскиот совет, Сашко Георгиев, кој дојде на оваа позиција по контроверзното разрешување на дотогашната претседателка Весна Дамева.
Тој ова го кажа во интервјуто за ТВ Сител, коментирајќи ја најавата на министерот за правда Кренар Лога за можен престанок на мандатот на сегашниот состав на Судскиот совет со законски преодни одреби.
„Право и обврска е на министерот за правда да дава законски предлози и решенија до Собранието и ќе останам без коментар во врска со тоа. Но, морам да потенцирам дека доколку се дозволи со некакви законски интервенции за Судскиот совет како тело, и за други тела коишто претставуваат уставна категорија, тоа ќе биде една лоша порака и лоша пракса за во иднина“,
изјави претседателот на Судскиот совет во гостувањето на ТВ Сител.
Дури и по сите контроверзни случувања во Судскиот совет, Георгиев кажа дека колективното распуштање на ова тело, односно престанок на мандатот на актуелните членови – не е решение.
„Замислете, ако колективно заминат сите членови, ќе имаме состојба кога ќе има празен простор кој да постапува за да дојдат новите членови. Согласно законската поставеност на Судскиот совет, целата таа процедура за новите колеги ја спроведува Судскиот совет“,
изјави Георгиев.
Говорејќи во оваа насока, претседателот на ова тело додаде оти за краток временски период завршува мандатот на најголемиот дел од членовите од овој состав на Советот, по што на нивно место за кратко време ќе дојдат нови.
Изјавата на Георгиев доаѓа два дена откако министерот за правда Кренар Лога најави дека власта и опозицијата деновиве ќе разговараат за целосно распуштање на Судскиот совет. Тој ова го најави како едно од можните решенија по загрижувачките настани во ова тело во последниот период.
Повеќе информации во врска со ова, рече министерот, ќе има следните денови откако ќе се разговара и со претставници на опозицијата во Собранието.