Моменталниот интензитет на бурата е на ниво Г3, што се класифицира како умерено до силно нарушување на магнетното поле на планетата
Геомагнетска бура предизвикана од засилена активност на Сонцето веќе почна да влијае врз Земјата, покажуваат најновите податоци од следењето на вселенското време, обработени од Институтот за применета геофизика.
Според научниците, моменталниот интензитет на бурата е на ниво Г3, што се класифицира како умерено до силно нарушување на магнетното поле на планетата.
Овој феномен е резултат на пристигнувањето на соларна плазма, односно исфрлање на маса од короната на Сонцето, што предизвикува привремени промени во магнетосферата на Земјата. Експертите предупредуваат дека ваквите геомагнетски нарушувања можат да траат неколку дена, а во овој случај се очекува влијанието да се задржи и до шест дена.
Последиците од бурата можат да се почувствуваат во повеќе области, особено во функционирањето на сателитските системи и комуникациите. Можно е да дојде до проблеми со GPS-навигацијата, прекини или ослабување на радиосигналите, како и одредено влијание врз електроенергетските мрежи, особено при поголеми пикови на активноста.
Покрај технолошките ефекти, ваквите појави носат и визуелни феномени, па така постои можност поларната светлина, позната како Аурора, да биде видлива и на пониски географски широчини, вклучително и во делови од Балканот.
Иако директното влијание врз здравјето на луѓето не е целосно потврдено, дел од експертите посочуваат дека кај почувствителни лица може да се појават симптоми како главоболка, замор или промени во крвниот притисок. Сепак, овие ефекти и натаму се предмет на научни истражувања.