Соединетите Американски Држави гласаа „воздржано“, а Русија „против“ резолуцијата. Пред гласањето, САД предложија резолуцијата да се гласа во два дела, тврдејќи дека некои формулации во документот може да го одвлечат вниманието од тековните преговори за мир. Украина, пак, го оцени ваквиот предлог како длабоко загрижувачки и неприфатлив
На денот кога се одбележува четиригодишнина од почетокот на руската инвазија, Генералното собрание на Обединетите нации (ОН) усвои резолуција која повикува на сеопфатен, праведен и траен мир во Украина.
Резолуцијата е усвоена со 107 гласа „за“, 12 гласа „против“ и 51 „воздржан“. Соединетите Американски Држави гласаа „воздржано“, а Русија „против“. Меѓу земјите кои ја поддржаа резолуцијата е и Северна Македонија.
Претставена од Украина и коспонзорирана од 46 земји, резолуцијата ги истакнува регионалните и глобалните последици од војната, изразувајќи сериозна загриженост за континуираните напади од страна на Русија врз цивили, цивилни објекти и критична енергетска инфраструктура.
Повикувајќи на итен, целосен и безусловен прекин на огнот, резолуцијата, исто така, повикува и на целосна размена на воени заробеници, ослободување на сите незаконски притворени лица и враќање на цивилите насилно префрлени или депортирани, вклучително и деца, како клучна мерка за градење доверба.
Пред гласањето, САД предложија резолуцијата да се гласа во два дела, тврдејќи дека некои формулации во документот може да го одвлечат вниманието од тековните преговори за мир.
„Нашето мислење е дека одредени формулации во резолуцијата веројатно ќе го одвлечат вниманието од тековните преговори, наместо да ја поддржат дискусијата за целиот спектар на дипломатски патишта што можат да го отворат патот кон траен мир“,
изјави заменик-претставничката на САД во ОН, Тами Брус.
Украина го оцени предлогот на САД како длабоко загрижувачки и неприфатлив.
По усвојувањето на документот, украинскиот претседател Володимир Зеленски изрази благодарност до секоја од земјите кои ја поддржаа резолуцијата, оценувајќи го за правилен и неопходен чекор.
„Ќе продолжиме активно да работиме за постигнување мир, заедно со нашите партнери“,
порача Зеленски.
I am grateful to each of the 107 countries that stood with Ukraine today in defense of life at the @UN.
— Volodymyr Zelenskyy / Володимир Зеленський (@ZelenskyyUa) February 24, 2026
The General Assembly adopted our resolution in support of a lasting peace, with clear calls for a full ceasefire and the return of our people.
These are the right and… pic.twitter.com/s5tmD1Bymm